Shillong, Naitung:
Ha ka 13 tarik u Jylliew kaba la bynshet kam ïa u Niyom Wierathandithakul, Phrae MP jong ka seng Party for Thailand bad uba long ruh u Chairperson jong ka Special Parliamentary Committee ba un pule ïa ki aiñ bad shim ïa ki sienjam ban tehlakam ïa ki E-cigarette ha ka ri. Une MP u la wanrah hakhmat ïa lai tylli ki kyndon treikam kiba long ka jingïai bteng ban khang ïa ki E-cigarette bad nang pyrkhing shuh ki aiñ ba la don lypa, dei ban da buh ïa ki kyndon ha kaba ïadei bad ki mar ba shna na u duna ïa kaba hap ban thang pynkhluid ne Heated Tobacco Products (HTPs) da kaba bteng ban khang ïa ki E-cigarette, dei ban da buh ïa ki kyndon treikam ha baroh ar tylli kata E-cigarette bad HTP.
Haba batai shaphang ka komitti, u la ong ba ki 35 ngut ki dkhot ki mih khmat ïa ki shnat treikam bapher bapher ba kynthup ruh ïa ki seng treimon sngewbha, ki ophis kiba ïadei khmih ïa kane ka bynta, bad ki briew shimet kiba la don jingtip ïa u E-cigarette. Kane ka kynhun ka la khot sngewbha ïa ki riew shemphang ba kin khmih bniah ïa ki jingkhat ba bun jait jong une u jingdih, ba kynthup naduh ka koit ka khiah, ka imlang sahlang, ïa ki khynnah bad ki samla, ïa ka ïoh ka kot bad ki bor ka aiñ. Ka komitti ka la shim ïa ka jinglong ba shisha jong ka Thailand, ha kaba u E-cigarette u dei uwei na ki daw ba ka imlang-sahlang ka ïakynduh jingeh bha. U la ban jur ba kine ki jingpyrshang ki long na ka bynta ka jingbha jong ka ri bad bynrap ba ka jingïada ïa ki khynnah bad ki samla kadei ka bynta ba hakhmat eh jong ka kommitti.
U Niyom u la ong ba, watla ki E-cigarettes ki long beaiñ ha Thailand, ka jingpyndonkam ïa ki ka la saphriang bha. Kumta, ka komitti ka donkam ban thaw ïa ki lad ki lynti bad ki kyndon kiba biang katkum ka jinglong ka Thailand, bad kren ïa ka jingshisha jong kane. Na kane ka daw, ka komitti ka la thaw ïa ki ar tylli ki kynhun Sub-group: kawei ka ban peit ïa ki kyndon ban pynïaid ïa ka kam bad kawei ka long ban pynkhreh ïa ka kaiphod. Ka jingtreikam jong ka komitti kan long kaba treilaitluid bad kaba ïahap katkum ka jinglong jong ka Thailand. Ynda la dep ïa kane ka jingwad bniah, ïa ki jingshem yn sa rah sha ïing dorbar House of Representatives khnang ba yn nang lah ban shim shuh shuh ïa ki rai da ka tnad Executive ne da ka sorkar ha kaba ïadei bad kano kano ka kyndon ba ki jied.
U Dr. Human Leethiraprasert, u MP ka Pheu Thai Party, uba long u Secretary ka kommiti, bad u heh duh jong ka Sub-kommitti ha kaba ïadei bad ki kyndon ban pynïaid ïa u E-cigarettes ha Thailand, u ong ka kynhun ba treikam ka sngewthuh ïa ka jingdonkam ban ïada ïa ka koit ka khiah jong ki briew bad ïada ïa ki khynnah bad kito kiba dang rit ka rta ba kin ïoh ïa ki E-cigarette. Wat la katta ruh, ka Sub-kommitti ka ïohi ïa ki jingduna ha ki aiñ kiba la don lypa bad kumta ka la pynmih ïa ki lai tylli ki kyndon kiba lah ban jied bad ïa kaba yn sa rah ka komitti kaba kham ha jrong kine ki long ba dei ban khang ïia ka jingpyndonkam ïa ki E-cigarettes, ïa kaba lah ban leh da kaba wanrah ïa ki aiñ kiba biang, kynthup ka jingpynbna ïa ka jingmana na ka tnad Ministry of Commerce bad ka Office jong ka Consumer Protection Board, ban pynsngewthuh shai bad ban nang pynïar shuh shuh ïa ka lad kumno ban lah ban tehlakam noh ïa ka jingpyndonkam ïa ki E-cigarette bad ïa ka jingpynmih ïa u, ne da kaba wanrah ïa ki aiñ kiba ïadei ban buh noh ïa u E-cigarette ha ka thup jong ki mar kiba long beaiñ, khnang ba kan pynlong ïa ka jingpynmih ïa ki E-cigarette, ka jingthied na shabar, ka jingdon ïa u, ka jingpyni lyngba ki byrta ki shula bad ka jingtan ïa u kin long noh kiba beaiñ.
Kawei pat ka long ba dei ban buh noh ïa kine ki jingdih kiba pyndonkam da kaba pynkhluit ïa u duma, ne ban pynkhluit khlem da thang, ha ka thup jong ki mar kiba donkam ban tehlakam da kaba thaw ïa ki aiñ, kynthup ruh ka jingmana na ka tnad Ministry of Commerce bad ka ophis jong ka Consumer Protection Board, bad wanrah ïa ki aiñ ki bathymmai khnang ba lah ban pynrung ïa kine ki mar kiba shna na u duma ba kin rung noh sha ka khajna jong ka Excise Tax hapoh jong ka Excise Tax Act bad donkam ïa kajuh ka kyndon ban ïoh ïa ki, ban ai ïa ki byrta ki shula bad ban tehlakam ïa ka jingïakren shaphang kine bad kiwei kiwei ki mar ba shna na u duma ka kyndon kaba khatduh ka long ba dei ban buh ïa baroh ar tylli kata ïa u E-cigarettes bad kiwei kiwei ki jingdih duma ïa kaba la pyndonkam da kaba thang pynkhluit ha ka thup kaba ïadei bad ki mar kiba la don ka jingtehlakam da kaba wanrah ïa ki aiñ kiba biang bad donkam ban da pyrkhing ïa kine ki kyndon.
