Imphal, Naitung:
Uwei u shipai jong ka tnat Central Reserve Police Force (CRPF) u la shah pynïap katba uwei pat u la mynsaw ha ryngkat arngut ki Commando jong ki pulit Manipur na ka jingshah hiar thma ha ki lehnoh ha Jirbam distrik kaba don ha Manipur ha ka Sngi U Blei.
Kane ka jingjia bashyrkhei ka la jia ha ki por ba dang bteng ki kam pyntriem ha kane ka jylla naduh ba la jia ki jingjia ïakynad jaitbynriew, la ïathuh u heh pulit. Katkum ka jingïathuh jong u Additional Superintendent of Police ka Jiribam, u Thomas Thokchom la ong ba ka kynhun ba la ïatreilang jong ki pulit ka tnat CRPF bad ki pulit ka jylla ka la shah siat ha ka jaka ba marjan bad ka shnong Mongbung bad ka shnong Sejang ha ka por ba ki dang pynlong ïa ka jingpahara kaba ju pynlong man ka sngi.
U Thomas u la ïathuh ruh ba uwei u lehnoh jong ka kynhun Kuki Liberation Army (KLA) u la mynsaw jur ha katei ka jingïasiat kaba la jia ha kaba u dang shah sumar ha Silchar Medical Hospital ha Assam.
U la ïathuh shuh shuh ba u pulit CRPF u Ajay Kumar Jha uba dei u nongshong shnong jong ka Bihar u la mynsaw na ki bynta ka khlieh ha katei ka jingshah thombor bad la pynkit noh mar mar sha Jiribam district Hospital, u la bynrap da kaba ong ba une u la khlad noh hashwa ban pynpoi ïa u sha ka jaka ai jingsumar.
