Shillong, Naitung 15
Ka lympung ïalehkai Under-20 Fourth Division 2024 ba la pynïaid da ka Shillong Sports Association ka la nangjam shaphang ha ka Lah Sngi U Blei ha kaba ka Lummawbah SC, Diengpasoh SC bad ka Nongthymmai Nongkynrih SC ki la ïoh jingjop.
Ha ka jingïakhun kaba la long ha SSA Stadium, ka Lummawbah SC ka la pynliem noh ïa ka Mawphlang SC da 2-1 kol. Ïa kine la thep da u Andraw Maring ha ka minit kaba nyngkong bad ïa kawei pat la pynbud da u Rickymond Muktieh (65), hynrei ka Mawphlang ka la pynphai kylla lyngba u Ïaidonkupar Kurbah (41).
Ha ka jingïakhun kaba la long ha kane kajuh hi ka stadium, ka Diengpasoh SC ka la pynliem noh ïa ka Pommura SC lyngba ka shi kol ba la thep da u Banpynkmen Kharsati ha ka minit kaba 49.
Haba phai sha kawei pat ka jingïakhun kaba la long ha madan MFA, ka Nongthymmai Nongkynrih ka la pynliem noh ïa ka Madan S&CC da 2-1 kol. Ha kane ka jingïakhun ka Madan ka la pynkhih jar nyngkong eh lyngba u Wankmen Lyngdoh ha ka minit kaba 4, hynrei hadien san minit ka Nongthymmai ka la lah ban pynphai kylla lyngba u Arman Chettri bad ïa kawei pat la pynbud da u Ïashanskhem Marbaniang (49) na ka bynta ban khur syndon ïa ka jingjop.
Ka jingïalehkai ha ka sngi Ba-ar kan long hapdeng ka Madanryting SC pyrshah ïa ka Lumpyngngad SC ha ka por 11:30 mynstep, kumjuh ka Raitsamthiah SC ïa ka Lumkseh SC (1:45PM) bad ka Nongkolew SC ïa ka Laitumkhrah SC 4PM). Kine baroh ki jingïakhun kin long ha SSA Stadium, Polo.
