Shillong, Naitung 15
U Myntri Rangbah, Conrad K Sangma, ha ka Lah Sngi u Blei u la ïakynduh ïa u Myntri Rangbahduh ka Ri, u Narendra Modi, ha nongbah New Delhi ha kaba u la kyrpad ïa u ban ai jingkyrshan pisa kaba kyrpang kaba kot sha ka T. 1,000 klur na ka bynta ban pynroi ïa ka New Shillong City.
Ha kane kajuh ka sngi, u Conrad u la ïakynduh ruh ïa u Myntri Korbar Ri, u Amit Shah.
Ha ka jingïakynduh bad u Modi, u Conrad u la pynsngew bad kyrpad ïa u ban mang pisa kyrpang kaba kot sha ka T. 1,000 klur na ka bynta ban tei bad pynroi ïa ka New Shillong City. U la ong ba lyngba ki projek bapher-bapher ban tei ha New Shillong City, yn sa lah ban pynduna ïa ka jingkhapngiah bad ha kajuh ka por kan kyntiew ïa ka pule ka dangle bad ki kam jngohkai pyrthei ha ka thaiñ Shatei Lam Mihngi.
Hynrei, ym pat shym la ïoh jingtip aïu u Myntri Rangbah u la ïakren bad u Amit Shah ha ka jingïakynduh bad u.
Ki don bun bah ki jingtei jong ka sorkar hangtei ha New Shillong. Lah ban pynkynmaw ba haba wanrah ïa ka Mang Tyngka jong u snem 2024-25 ha u bnai Lber mynta u snem, u Myntri Rangbah, u la ïathuh ba ka sorkar ka la shim ïa ki sienjam ban tei ïa ka New Shillong Township. U la ong ba la dep ban mang ïa ka jaka kaba 232 Acre ban tei ïa ka New Shillong Administrative City ha kaba kan don ka Secretariat bad kiwei pat ki shlem treikam jong ka sorkar. Ka dor jong kane ka jingtei kan long kumba T. 550 crore.
Nalor jong ka Administrative City, ka sorkar kan shna ruh ïa ka Knowledge City ha Mawkhanu-Mawpdang ha ka khyndew kaba don 808 Acre bad ïa kane ka khyndew, ka sorkar ka la dep ban thied. Kane ka New Shillong Knowledge City kan pynleit jingmut ha ki kam ïalehkai, Information Technology, kam jngohkai pyrthei bad kiwei. Ïa ka Detailed Project Report (DPR) ban tei ïa kane ka Knowledge City ha ka jinglut kaba T. 5,400 klur la dep ban phah sha ka Sorkar India.
U Conrad u la ong ba ïa ka jingshna ïa kiba bun ki projek ha katei ka Knowledge City yn bei tyngka da ka sorkar jylla, Sorkar India bad na ki ‘riew shimet. La khmih lynti ba lyngba ka Administrative City bad Knowledge City, yn lah ban thaw ïa kumba 50,000 tylli ki kam. Na ka bynta ban shna surok ban pynïasoh ïa ka Shillong bad ïa ka Administrative City ha Umsawli bad hapdeng ka Administrative City bad ka Knowledge City ha Mawkhanu, la mang kumba T. 520 klur. Ha kajuh ka por, u Conrad u la pynbna ba na ka bynta u snem 2024-25, ka sorkar ka la mang T. 365 klur ban tei ïa ki projek bapher-bapher ha ka Administrative City bad ka Knowledge City.
