Shillong, Naitung 15
Ka Hynñiewtrep Youths’ Council (HYC) ka la leit ban ïakynduh bad dawa jingpynshai na ka Medical Superintendent ka Ganesh Das Government Maternal and Child Health Hospital Shillong ha ka 15 tarik u Naitung hadien ka jingpynmih jingpynbna bathymmai na ki bor pynïaid jong katei ka jaka ai jingsumar ba kiba wan shah sumar khamtam ki khyllung ha ka Neonatal Intensive Care Unit (NICU) kaba don ha ka mala bathymmai ba kin hap ban siew da ka dor.
Haba kren sha ki lad pathai khubor, u President ka HYC, u Bah Roy Kupar Synrem u la ong ba hadien ba la pynmih ïa katei ka jingpynbna da katei ka jaka sumar, la ïohi ba ka don ka jingohdor bapher-bapher ban sumar ïa ki khyllung kiba dang shu kha, bad na ka liang ki paidbah ki la ud la nam shikatdei eh halor kane kaba la pynlong ïa ka seng ba kan tuklar bad ban leit ïakynduh ïa ki bor ba dei khmih ïa katei ka jaka ai jingsumar.
U Bah Synrem u la ïathuh ba hadien ka jingïakren bad ka Medical Superintendent jong katei ka jaka ai jingsumar, ka la pynshai ba katei ka dor thymmai ka dei na ka bynta ka mala kaba thymmai ïa kaba la tip kum ka Neonatal Intensive Care Unit (NICU) ha kaba kin don haduh 40 tylli ki jingthiah ha kane ka jaka ai jiingsumar. Kumta khnang ba kin pynïaid ïa ki jingdonkam bapher-bapher jong kane ka jingai jingsumar, na ka liang ka Internal Committee ki la shim ïa kane ka rai ban pyllait paidbah ïa katei ka jingpynbna.
U Bah Synrem u la ong ba ka seng ka la buh jingkylli ruh ïa ka MS ba kiba bun ki briew kim don ïa ka MHIS Card bad kiba don ïa ka MHIS Card ruh kim pynïasoh ïa ka Aadhar Card lane kim don ïa ka Aadhar Card.
“Ngi la buh jingkylli ïa ka Medical Superintendent ba ïa kine ki jingsiew, lah ne em ban kam lyngba ka MHIS Card bad ka la pynshai ba kiba don ïa ka MHIS Card, kim donkam ban siew. Ngi la kylli ruh ba lada ki don ki nongpang ki bym don ïa ka Aadhar bad ki bym lah ban pynïasoh bad ka MHIS Card, kaei kaba kane ka hospital ka lah ban leh ne ïarap ïa ki”, la ong u Bah Synrem.
Halor kane ka bynta, na ka liang ka MS ka la ong ba katei ka jaka ai jingsumar kan sa buh da ka MHIS Cell ha kaba ki briew kiba wan thiah pang ha katei ka jaka ai jingsumar, ki lah ban pynrung kyrteng ïalade ban leh ïa ka Aadhar Card bad ha kajuh ka por ki lah ruh ban pynïasoh ïa ka Aadhar Card bad ka MHIS Card.
Ha kaba ïadei pat bad ka jingbym don jong ki nongpang ïa ka MHIS Card, na ka liang ka MS ka la ong ba ki nongpang ki lah ban pyndonkam da ka BPL Card, ka Ration Card ne ka jingpynshisha na ki Rangbah Shnong ban pynshisha ba ki wan na ki longïing-longsem kiba duna ha ka ïoh ka kot.
