Shillong, Naitung 15
U rangïalehkai ba paw ka Germany u Thomas Mueller, u la pynbna ban shong-thait noh na ka jingïalehkai phutbol bar ri hadien ba la shim bynta khatduh ha ka Euro 2024.
Une u rangïalehkai 33 snem ka rta, uba la long u nongïalehkai ba kongsan na ka bynta katei ka kynhun naduh ba u la ïalehkai nyngkong eh ha u snem 2010, u la ong ba ka por ïalehkai ka jong u ha ki 14 tylli ki snem bad kane ka kynhun ïalehkai jong katei ka ri ka la kut.
“Hadien 131 tylli ki jingïalehkai na ka bynta ka Germany bad 45 tylli ki kol, nga hap ban ong khublei”, la pynpaw u Mueller ha ka kyrwoh lyngba ka dur khih ha kaba pynbna ïa ka rai jong u.
U Mueller, uba long u rangïalehkai ba kongsan bha na ka bynta ka kynhun ïalehkai ka German, u la don ka bynta kaba kongsan bha ha ka jingjop jong ki ha ka jingïalehkai World Cup 2014. Ka Germany ka la khur ïa ka jingjop pyrshah ïa ka Argentina hadien ka jing ïakhun kaba tyngeh ha shwa ban rai ïa ka nam lahduh.
Katba u Mueller u nangjan sha ka sngikha ba 35 snem mynta u bnai Naitung, u la phai dien halor ka jingjop kum kawei na ki jingïalehkai ba pawnam jong u. “Haba nga la ïalehkai nyngkong eh ïa ka jingïalehkai bar ri na ka bynta ka kynhun ïalehkai jong ka Germany ha ki 14 snem mynshwa, ngam lah ban phohsniew ïa kine baroh”, la bynrap u Mueller.
“Ki jingjop kiba khraw bad ki jingshah rem kiba lehraiñ. Teng teng ha madan na ka bynta ban wanphai biang sha ka thong,” u la bynrap.
“Ka ju pynlong ïa nga ban sngew sarong shibun ha kaba nga ïoh ban ïalehkai na ka bynta ka ri jong nga. Ngi la ïalehkmen lang bad ka kynhun bad teng teng ngi hap ban jaw ummat lang.”
Ka jingïalehkai ba pawnam jong u Mueller ha ka pyrthei ka la poi sha kaba kut hadien ba ka Germany ka la shah rem da 2-1 ïa ka Spain ha ka jingïakhun quarter final jong ka Euro 2024.
Ha kane ka jingïakhun kaba la long ha madan jong ka Germany, ka la pynlong ïa u Mikel Merino ka Spain ban thep ïa ka kol na ka bynta ban khanglad shi syndon ïa ka Germany ban rah ïa ka trophy.
Da kaba paw ba u la sngewsih hadien katei ka jingïalehkai, u Mueller u la ai jingmut ba kane ka lah ban dei ka jingïalehkai kaba khatduh jong u na ka bynta ka kynhun ïalehkai jong ka Germany.
