Shillong, Naitung 15
Ka Khun Hynñiewtrep National Awakening Movement (KHNAM) ha ka Lah Sngi U Blei ka la ong ba u Myntri Rangbah ka Jylla, u Conrad K. Sangma u dei ban pynshai halor ka jingpynphai jong ka tnad kam pohïing ka Sorkar Pdeng ïa ka Meghalaya Residents Safety and Security Act (MRSSA) Amendment Bill, 2020.
“Ka MRSSA ka mih hadien ka jingdawa ïa ka Inner Line Permit (ILP) bad ka dei ka buit ka Sorkar (ha kito ki por) ban pynduh ïa ka ILP. Hynrei ka MRSSA ka ïapher bak-ly-bak bad kam dei kajuh ka sobjek bad ka ILP,” la ong u Working President ka KHNAM, Bah Thomas Passah.
U la ong ruh ba ka MRSSA ka dei ka aiñ ban pynrung kyrteng bad pynshisha ïa ki nongshong shnong ha ki shnong bapher-bapher katba ka ILP ka long ban pynshisha ïa kito kiba wan shapoh ka Jylla naduh ka por ba ki rung na khyrdop – shano kin leit, katno sngi kin sah bad kumta ter-ter.
Halor ka rai kaba la mynjur da ka ïingdorbar thawaiñ ha u snem 2019 haba ïadei bad ka jingpyntreikam ïa ka ILP hapoh ka Jylla, u la ong ba kane ka dei ka sienjam tang kumno ban theh umpjah ïa ka jingïakhih jong u paidbah.
Haba kdew ba ka mat halor ka MRSSA mynta ka la khongwaiñ, u Bah Passah u la ong ba katkum ka jingïathuh u Myntri Rangbah, ïa kane la phah da u Lat sha ka tnad kam pohïing ka Sorkar Pdeng, ïa kaba ka tnad ka la pynphai biang ha ryngkat ki jingai jingmut ban wanrah ïa katto-katne ki jingkylla.
Haba ïadei bad kane, u la ong, “Balei u Myntri Rangbah um batai kiei kita kiba ka tnad kam pohïing ka Sorkar Pdeng ka phah ban pynbeit…kane kam shai. U dei ban pynshai kiei kita bad balei ba ka tnad kam pohïing kam pdiang ïa ka. U Myntri Rangbah um dei ban buhrieh halor kane.”
U Bah Passah u la ong ruh ba ïa ka mat halor ka ILP bad MRSSA, u Myntri Rangbah u kren tang ynda ki kynhun seng ki la sdang ïa ki jingkhynra jong ki, lym kumta, u sngap jar beit halor kane ka bynta.
Haba pynkynmaw ba ha u snem 2019, u Myntri ka tnad kam pohïing ka Sorkar Pdeng, u Amit Shah u la phah wan ïa ka Sorkar hadien ka Khristmas ban ïakren halor ka ILP, utei u nongïalam u la ong, “Katno tylli ki Khristmas ki la dep? Imat u Myntri Rangbah u leit shathie tang ban dih sha. Ngi tharai kin shimkhia halor kane.”
Shuh shuh haba pynsngew ba ïa ki kyntien ‘Khasi State’ la weng noh na ka ‘Preamble’ jong ka Bengal Eastern Frontier Regulation (BEFR), 1873, u Working President ka KHNAM u la bynrap, “Ka kyrteng ka dei ban don. Hashuwa, ka Manipur kam don, hynrei ha u snem 2019, la thep ïa ka kyrteng bad ka Manipur ka la ïoh ïa ka ILP. Khlem ka jingdon jong ka kyrteng ‘Meghalaya’ ha ka BEFR, ngin ym ïoh ILP.”
Na ka liang u Bah Passah, u la kynnoh ba ka Sorkar Pdeng ka la weng ïa ki kyntien ‘Khasi State’ na ka BEFR ha ryngkat ka jingtip jong ka Sorkar Jylla.
