Guwahati, Naitung:
Na ka jingkhmih bniah ha kine ki bnai naduh ba la sdang ka jingjur slap bad ka jingshlei um, la shem ba ka shnong Nawarbita, kaba don ha Kokrajhar distrik, Assam, ka la shah ktah jur na kiba bun ki jingshah rong noh jong ka khyndew harud jong ka wah Longa namar ka jingjur ka jingtuid jong ka um na Bhutan.
Ka jingrong noh jong ka um ïa ka khyndew ha ki shnong kiba don harud wah, ka la pynduh jaka sah ïa 70 haduh 80 tylli ki longïing bad ka la rong ïa hajar Hectare ka jaka kiba don ha ki shnong bapher bapher.
Ka jingtwa jong ka khyndew ka la pynduhnong haduh katta katta ïa ki nongshong shnong naba ki jingdon jingem baroh ki la shah rong lang ryngkat ka khyndew, ka la rong ruh ïa ka skul Nawarbita LP School bad ïa kiba bun ki jaka mane blei jong ki Muslim.
Kum shi bynta ban leh ei ei halor kane, ka Assam Water Resources Department ka la mang pisa ïa ka projek kaba T. 150.79 lak na ka bynta ban ïada ïa ka shnong.
Ha kaba ïadei bad kane, ki nongshong shnong ki la pynshisha da kaba ong ba ki jingtrei shitom jong ki baroh ban ïada na ka jingshahrong ka khyndew ki la ong lehnohei.
Na ka liang ki nongshong shnong naba kim lah ban leh ei ei da ka bor jong ki, ki la buh ka jingkyrpad na ka sorkar jylla ha kaba ki la ong:
“Ngi buh ka jingkyrpad ïa ka sorkar Assam na ka bynta ban ïada ïa ki ïing jong ngi, ki jaka mane blei jong ki Muslim kiba don ha kine ki thaiñ bad ki jaka pule. Kine ki jingeh ba ngi ïakynduh ki la long da bun bun snem. Ki jinglong jingman jong ki surok ki la buh jingma. Ka shnong Nawarbita ka la long kawei na ki shnong kaba la rim bha, bad ki la jandon 70 tylli ki ïing kiba la shah rongnoh ha ka wah. Ngi donkam ïa ka jingïarap kaba kyrkieh kham kloi katba lah.”
Naba ki nongshong shnong ki la ïai kynduh jingeh na ka jingduh noh ïa ki jaka bad ki jingdon jingem na ka jingshah rong ka khyndew ha ka wah Longa, ki la pynpaw ba ki don ka jingkyrmen na ka bynta ka jinglah jong ka sorkar ban trei shitom ha ka ban ïakren sani bha halor ki jingeh ba ki ïakynduh.
