Shillong, Naitung 16
Ka Social and Economic Life Development Department (SELDD) jong ka Khasi Jaiñtia Presbyterian Synod Sepngi lyngba ka Agency For Sustainable Development Initiatives, kan pynlong biang ïa ka jingïakop mareh ba la tip kum ka ‘Shillong Run 10K 2024’ ha ka 3 tarik u Naiwieng 2024 mynta u snem.
Ka jingthmu jong kane ka jingïakop mareh ka long kum shi bynta ban sngewthuh ïa ki jingeh bad ka jinglong ïaryngkat dor ki briew ba don jingduna bad kumjuh ruh ban pynmih pisa ha ki kam kiba ka Synod ka la seng na ka bynta ki khynnah kiba don jingduna ha ki dkhot met bapher bapher.
Haba pynpaw ha ki lad pathai khubor ha ka sngi Ba-ar, u Rev. Bidonbok Syiem, Convener Facilities & Operation Committee ka Shillong Sun u la ong ba kino kino kiba don jingthmu ban ïashim bynta ki lah ban pynrung kyrteng lyngba ka online lane ha ka website lane kiba kwah pynrung kyrteng lyngba ka offline ki lah ban leit shim ïa ki form na ka ophis treikam jong ka KJP Synod Sepngi kaba don ha Mission Compound Shillong.
Te kumta la pdiang sngewbha ïa baroh naduh ki rangbah ki samla bad khynnah kynthei bad shynrang bad kumjuh ruh nabar ka Jylla lada don kiba kwah ïashim bynta. Ka bairung ha kane ka jingïakop mareh ki long kynthup ïa ki kynthei bad shynrang na ka bynta kiba hapoh 15 snem ka long T. 300 tyngka, 15 snem haduh 18 snem ka long T. 400 tyngka, 18 snem haduh 35 snem ka long T. 800 tyngka, 35 snem haduh 45 snem ka long T. 600 tyngka, 45 snem haduh 55 snem ka long T. 600 tyngka, 55 snem haduh 65 snem ka long T. 600 tyngka bad ïa kiba 65 snem shajrong ka long T. 600 tyngka marwei.
Ka khusnam na ka bynta u ne ka nongjop ha ka kyrdan 18 snem haduh 35 ka long T.50 hajar tyngka ïa kiba wan ba nyngkong, T.30 hajar ïa kiba wan ba-ar bad T.20 hajar ïa kiba wan ba-lai bad kiwei kiwei ki khusnam ha la ki jong ki kyrdan jong ka snem. Ka tarik ba khatduh ban thep kyrteng kan long ha ka 26 tarik mynta u bnai.
