Shillong, Naitung 16
Ka hat-trick ba la khur da u Arki Kshiar ka la biang pura ïa ka Madanryting SC ban pynliem noh ïa ka Lumpyngngad SC da 5-2 kol na ka bynta ban khur ïa ka jingjop ha ka lympung ïalehkai Under-20 Fourth Division Football League ba la pynïaid da ka Shillong Sports Association ha ka sngi Ba-ar ha kane ka nongbah.
Ha kane ka jingïakhun u Arki Kshiar u la khur ïa katei ka hat-trick da kaba u la ïoh ban thep ha ka minit kaba 35+1, 57 bad 69. Katba ia kiwei pat la pynbuh da u Modern Pyngrope (41) bad u Annand Kharkongor (52). Na ka liang ka Lumpyngngad ka la lah ban pynphai kylla lyngba u Ioanis Sangma (15) bad u Ruby Daimary (70+1).
Ha ka jingiakhun kaba ar, ka Raitsamthiah SC ka la pynliem noh ïa ka Lumkseh SC da 4-1 kol. Ïa kine la thep da u Wanphrangjingshai Shabong ha ka minit kaba 12. U Jonewest Mawïong u la thep ar kol ha ka minit kaba 44 & 69 bad ïa kawei pat la ïarap pynthep da u rangïalehkai ka liang pyrshah u Pain Mawrie (66). Na ka liang ka Lumkseh ka la thep kham hashwa da u Borsing Marboh (5).
Haba phai sha kawei pat ka jingïakhun kaba lai, ka Nongkolew SC ka la lah ban pynliem noh ïa ka Laitumkhrah SC da 2-0 kol. Ïa kine la thep da u Pynshai K. Wanñiang ha ka minit kaba 11 bad u Pynshngaiñ Mujai (25).
