Shillong, Naitung 16
Ka jingduna ha ki dkhot met ka dei ka jingïashem ha kano kano ka bynta kaba pynlong ïa ki briew ban shem jingeh shuh shuh haba ki thmu bad leh ïa kano kano ka kam. Pynban lada ki don shisha ka jingthmu naduh ka dohnud ka lah ban pynurlong ïa kiei-kiei baroh.
Kane ka khubor ka dei kumjuh ïa ka samla Prisca Pyngrope kaba don ïa ka sap ïalehkai kaba kyrpang kata ban ïakhun kti. Kane ka samla lyngba ka jingtrei shitom ka la shah jied ban mihkhmat ïa ka ri India sha ka World Arm Wrestling Championship 2024 ka ban long ha Maldova, Europe.
Kane ka samla kaba dei ka khunswet bad bym don kmie don kpa shuh, ka la long kaba trei shitom bad kaba don shisha ïa ka jngmut kaba skhem ban trei shitom bad ka bym ju pynsngap ïa kiei kiei baroh kiba wan ha ka jingim jong ka.
Ka jingïaid lynti jong kane ka samla kam long kaba suk, ka hap ban sangeh noh na ka jingleit pule na ka daw bym don ban kyrshan lem. Ban kyrshan dalade ïalade kane ka samla ka la wad kam bad ïoh ban trei ha Nazareth Hospital. Hadien kane ka la leit ban pule bad pyndep ïa ka graduate ha ka subjek Psychology na Lovely Professional University, Punjab, lyngba ka scholarship ba kyrpang.
Na ka liang ka Prisca ka la pynpaw ïa ka jingsngewtynnad ban ïashim bynta ha kane ka jait jingïalehkai naduh u snem 2018. Nangta ka la sdang ban ïalehkai basketball da kaba shu shong ha ka wheel chair kaba long ruh shi bynta ka jingmyntoi na ka bynta ka koit ka khiah jong ka.
Hadien ka jingmih ka jingïalehkai arm wrestling na ka bynta kiba duna dkhot met, ha u snem ba la dep ka Prisca ka la ïoh ka lad ban ïakhun ïa ka Arm Westling ha ar tylli ki jingïakhun hapoh ka jylla. Ka la shah jied ban ïakhun ha Nagpur, Maharashtra ha kaba ka la wan ba-ar bad ba-lai, bad mynta pat kan sa ïoh ban mihkhmat ïa ka ri India ha Moldova ka ban sa long ha u Nailar mynta u snem.
Wat la ka la ïoh ban pynkhreh tang shi taïew ha shwa ba kan ïakhun ha Nagpur, ka Prisca mynta ka kynti kan ïoh jinghikai pyntbit ba kyrpang na ka bynta ban ïakhun ha Moldova, bad ka hap ban pynlut por 3-4 kynta man ka janmiet ban shah pyntbit. Kane jingïaid lynti jong ka, ka pyni shisha ïa ka jingïaishah bad ka jingkut jingmut jong ka.
