Shillong, Naitung 16
Ka jingïoh ïakren kyrpang U Nongsaiñ Hima bad u Bah Marvel Sungoh uba trei ha nongbah Delhi bad kawei ka kynhun kaba kyrteng My Home India, ka la ai jingïarap ïa uwei u kpa bad ïa u khun na kawei ka shnong ha Ri Bhoi kiba la sahkut mynta ha Chandigarh.
Une kpa u dei ba leit ïalam ïa u khun sha Chandigarh ban ïalehkai phutbol, hynrei mynta u dang sahkut ha katei ka jaka hadien kiba ïalam ïa u bad ki paralok jong u ki la wanphai sha Meghalaya.
Kumta haba um don lad shuh da kumwei pat ban wanphai sha Meghalaya u la wad number phone jong u Bah Marvel Sungoh. Haba u ïohi ïa ka khubor ba pyllait dang shen ha U Nongsaiñ Hima Channel namar u Bah Marvel u dei uwei uba ïarap ïa ki briew na thaiñ Shatei Lam Mihngi bad na jylla Meghalaya ïa kiba ïakynduh jingeh haba ki wan sha Delhi.
Ha ka jingkutlad u la wad ïa u number phone na My Home India bad ka la poi sha Mumbai, bad kiba trei ha katei ka kompani ki la ai ïa u number phone jong u Bah Marvel Sungoh.
Na ka liang u Bah Marvel u la pyntip sha U Nongsaiñ Hima ha ka Sngi Ba-ar ba une u rangbah mynta u la sngew shngaiñ mar shu ïoh ban ïakren bad u namar lashai ka sngi ka 17 tarik Naitung 2024 un wan sha Delhi da ka jingïarap jong u.
Shuh shuh u la pyntip ba une u rangbah u dang dei ka sien kaba nyngkong ba un leit sha Chandigarh bad u khun ba dang 10 snem ban wan ïalehkai phutbol.
Namar kata, u Bah Marvel u la kyrpad ïa ki paidbah ka jylla lada ki don kiba ïakynduh jingeh ne shah thok haba ki wan sha Delhi kin sngewbha ban phone ïa u ha une nombor-7002802561.
