T. 1 lak noh synñiang u Bah Sanbor ïa i Kong Kmoiñ shwa ban leit shim bynta sha Australia

I Kong Kmoiñ ba la 76 snem ka rta na ka shnong Shngimawlein kaba hajan Mawkyrwat, South West Khasi Hills, i la don haduh 16 ngut ki khun lem bad 54 ngut ki khun ksiew...

Shillong, Naitung 16

U MLA ka South Shillong constituency u Bah Sanbor Shullai u la noh synñiang da ka song jingïarap pisa ïa i Kong Kmoiñ Wahlang i ban pynkhreh leit mihkhmat ïa ka Ri India na ka bynta ban leit ïashim bynta sha ka 13th Pan Pacific Master Games 2024 ka ban long ha Gold Coast Queensland kaba ha Australia ha u Risaw mynta u snem.

Ïa kane ka jingïalang  la pynlong ha ka Sngi Ba-ar ha kaba utei u nongmihkhmat u la noh synñiang da ki jingai sngewbha ryngkat ka cheque kaba T. 1 lak tyngka lem bad T. 30 hajar ïa u khlur nongmareh barim ka Jylla u Bah Biningstar Lyngkhoi, u ban leit synran lang ïa i Kong Kmoiñ sha Australia.

I Kong Kmoiñ, i dei ba ba la rangbah bad tymmen tam napoh ka Jylla ban ïashim bynta ha kiba bun ki jingïakop mareh la ka long hapoh ka Jylla ne wat ha kylleng jong ka ri. Lyngba ka jinglah ban leh bha ha kawei na ka jingïakop napdeng ki nongshim bynta ha ka rta kaba 76 snem shaneng kaba long ha Hyderabad mynta u snem, i Kong Kmoiñ i la shah khot ha ka Pan India Masters Games Federation.

Na ka liang u Bah Sanbor u la pynpaw ïa ka jingsngewkmen ban ïadon bynta lang ha ka ban noh synñiang ïa i Kong Kmoiñ Wahlang. “Kiba bun na ki paidbah kin lyngngoh ïa nga ba balei nga leit ban ai jingïarap ïa i Kong Kmoiñ i ba naduh South West Khasi Hills. Hooid nga dei u MLA jong ka South Shillong Constituency, hynrei nga don ka jingkitkhlieh na ka bynta ka Jylla hi baroh kawei. Ka jingnoh synñiang ka jong nga ïa i kong Kmoiñ ka long ban ïa kitbok lang ïa i namar haba i leit sha Australia, i mihkhmat ïa ka ri India hi baroh kawei.”

I Kong Kmoiñ ba la 76 snem ka rta na ka shnong Shngimawlein kaba hajan Mawkyrwat, South West Khasi Hills, i la don haduh 16 ngut ki khun lem bad 54 ngut ki khun ksiew bad ki khun miaw.