Shillong, Naitung 16
Ka jinglehkmen ha Madrid ka la wan mih paw hadien ba ïa u khlur ïalehkai shakhmat ka France u Kylian Mbappe la pynbna paidbah da u President ka Real Madrid u Florentino Perez ha ka Sngi Ba-ar.
U Mbappe uba la mih noh na ka PSG un phong ïa ka jersey number 9, kaba la ju phong da u rangïalehkai shakhmat ka France u Karim Benzema bad uba la ïohpdiang ïa ka khusnam Ballon D’or.
Ka khubor halor ka jingrai u Mbappe ban pynïasoh sha kane ka klob ka la wan hadien katto katne sngi ba ka Real Madrid ka la rah ïa ka nam lahduh kaba khadsan jong ka Champions League da kaba pynliem 2-0 kol ïa ka Borussia Dortmund.
Kane ka klob ka la pynkup burom ïa ki khlur ïalehkai kiba noh la u synñiang sha kane ka klob kynthup ïa u Toni Kroos, Luka Modric bad u Nacho Fernandez.
Hynrei mynta ka jingïai ap khmih ban soi ïa u khlur ïalehkai shakhmat ka la wan urlong bad la sngewthuh ba ka Real Madrid kan ym pynlehnohei ban tyrwa ïa utei u rangïalehkai shakhmat ka France kumba ka la leh ïa u Cristiano Ronaldo.
Kat kum ki khubor la ong ba ka Real Madrid ka la rai ban thung ïa u Antonio Pintus ban khmih ïa ka jingbit jingbiang jong u Mbappe.
U Pintus uba la shah khot kyrteng kum u Ser-geant, u dei uba la tip kum uba ju pyrkhing ha ka por ba ai jinghikai bad u don ïa ka thong kaba long kum u Ronaldo na ka bynta utei u rangïalehkai ka France.
U Pintus u la ïarap mynshwa ïa u Ronaldo ban ïoh ïa ka jinglah ban ïalehkai bad ka jingkoit jingkhiah kaba la ailad ïa u ban ïai bteng ban ïalehkai wat ha ka rta kaba 39 snem.
Wat la katta ruh, u Mbappe uba long u nongthep kol ba pawnam jong ka PSG, mynta u la rung sha ka kynhun jong ka Los Blancos, kaba la pyndap da ki khlur kum u Jude Bellingham bad u Vinicius Jr.
U manager jong ka Real Madrid u Carlo Ancelotti watla un hap ban pynkhihwin ïa ka kynhun jong u ban wad jaka ïa u Mbappe.
Une u rangïalehkai ba 25 snem ka rta u pawnam bha ha ka liang ka diang jong ka jingïalehkai, ha kaba u Vinícius ba 23 snem ka rta u ju ïalehkai man ka por. Ha kawei pat ka liang la ju bat da u Rodrygo uba dang 23 snem ka rta, uba dangshen u la kren shaphang ka jingthmu ban mih noh na ka Madrid lada um sngew ba u long uba myntoi na ka bynta kane ka klob.
