Shillong, Naitung 17
U Luka Modric u la bteng ban soi ïa ka jingïateh kular kaba shisnem bad ban ïai sah ha Los Blancos haduh u snem 2025, la pynbna kane ka klob ha ka sngi Balang
“Ka Real Madrid C. F. bad u Luka Modric, ki la mynjur ban pynjlan ïa ka kontrak jong u kapten jong ngi, u ban ïai neh bad ka klob haduh ka 30 tarik u Jylliew jong u snem 2025,” la ong ka Real ha ka kyrwoh kaba la pynpaw ruh ba une u rangïalehkai ka Croatia un long u kapten jong ka kynhun ha kane ka aïom ka ban wan.
U Modric uba la iohpdiang ïa ka khusnam Ballon d’Or ha u 2018, u la pynïasoh sha ka Real Madrid ha u snem 2012 bad dangshen un la ïadon bynta ban khur ïa ka nam lahduh kaba hynriew ha ka Champions League bad sien ha ka lympung LaLiga na ka bynta ka Real.
U la jop baroh 26 tylli ki nam lahduh bad ka Real kaba kynthup ïa ki 6 tylli ha ka Champions League, 5 tylli ha ka Club World Cup, 4 tylli ha ka European Super Cup, 4 tylli ha ka lympung La Liga, 2 tylli ha ka Copas del Rey bad 5 tylli ha ka Spain Super Cup.
Ha ki 12 tylli ki samoi ïalehkai bad kane ka klob, u Modric u la lah ban mih madan haduh 534 sien bad u la thep 39 tylli ki kol. Ka jingïateh ba mynshwa jong u ka la kut noh ha kaba kut jong ka aïom ïalehkai 2023-24, hynrei une u rangïalehkai ka Croatia u la ïathuh ha ki nongkyrshan ba un wanphai biang ha ka samoi ban wan ha ka por ba ki dangrakhe ïa ka jingjop jong ki ha ka Champions League kaba la pynjlan ïa ka rekod jong ka Real sha ka 15 tylli ha ka European Cup.
Utei u rangïalehkai ba la rim bha, u la khmih lynti ba un shongthait noh, khamtam hadien ba u paralok ba la slem bha jong u, u Toni Kroos, 34 snem ka rta, u la pynbna ïa ka jingshongthait noh ha kaba kut jong ka aïom ïalehkai.
U Modric ruh um shym la don jingthmu ban pynsangeh noh ïa ki juti jong u ha ka madan ïalehkai ka pyrthei watla ka jingïaid lynti ka Croatia ka la poi sha kaba kut tang ha ka jingïalehkai (group stage) ha ka European Championship.
“Nga kwah ban ïai bteng ban ïalehkai junom, hynrei lehse kan sa poi ka por ba ngan hap ba ngan pynsangeh noh ïa ki boot jong nga. Ngan dang ïai bteng ban ïalehkai, hynrei ngam tip haduh katno por”, la bynrap u Modric uba la lah ban ialehkai 178 sien na ka bynta ka Croatia.
