Shillong, Naitung 17
Ka Hynñiewtrep Youth’s Council (HYC) ha ka Sngi Balang ka la rakhe ïa ka jingïaid lynti ba 10 snem ka jong ka hadien ba la seng ïa ka ha u snem 2014, bad mynta ka sngi ka dei ruh ka sngi ba ka jaitbynriew ka kynmaw burom ruh ïa ka lyngkhuh sngi khlad kaba 189 jong u riewkhraw bad u riewshlur, u Tirot Sing Syiem.
Ha kane ka sngi lyngkhuh dap snem jong ka seng, la pyndap smam ïa ka Hall jong ka Lariti, Mawdiangdiang da ki spah ngut ki nongkitkam bad ki dkhot ka seng ha kaba la don bynta lang ruh da uwei na ki nongseng ïa ka HYC bad uba dei u President banyngkong ka seng, u Bah Peter J. Lawai, u President barim, u Bah Robert June Kharjahrin, u President ba mynta, u Bah Roy Kupar Synrem, u MDC ka Mawkynrew, u Bah Martle N. Mukhim nalor kiwei-kiwei ki nongshah khot sngewbha.
Ha kane ka sngi la pynkupburom kyrpang ruh ïa ka Kong Silbi Passah kaba dei ka nongïoh khusnam Padma Shri bad ka la don ruh ka jingsam khusnam ïa ki khun samla kiba wan shakhmat ha ki kyrdan jingpule kiba kynthup naduh kiba pas bha ha ka MBOSE, CBSE, ICSE bad kumta ter-ter.
Na ka liang u President ka HYC, u Bah Roy Kupar Synrem u la ong ba la seng ïa ka HYC halor ka nongrim ban ïada, ban pynneh-pynsah bad ban kyntiew shuh-shuh ïa ka snap ba kyrpang jong ka Jaitbynriew Hynñiewtrep bad ki hok ba ka dei ban ïoh bhah ha ki liang baroh kiba kynthup ïa ka hok ban ïada bad ban kyntiew ïa la ka jong ka ktien, ka kolshor bad ka rukom ki jaka-puta, ki lum-ki wah, ka khaïi-ka pateng, ka suk-ka shngaiñ bad kumta ter-ter.
Halor ka jingleh kuman ka sorkar ban pyntreikam ïa ki aiñ ki ban ai jingïada ïa u pud u sam ka jylla, u Bah Roy u la ong ba kum ka seng kan ïai ïeng skhem ha ka nongrim ban dawa ïa ki aiñ ki ban pynskhem ïa ki hok longtrai jong ka Jaitbynriew halor ka khyndew ka shyiap, ka ktien ka thylliej, ka kolshor bad kumta ter-ter.
“Ka jingkheiñ sting jong ka sorkar jylla halor ki mat ka pynbitar ïa ngi ki khun samla jong ka Ri kiba don ka jingkitkhlieh na ka bynta ka suk-ka shngaiñ jong ka Jaitbynriew hi baroh kawei. Lada ka sorkar jylla ka kuman bad ka alhia ban buddien bad ka sorkar pdeng halor kane ka phang, kum ka seng ngin ïai khih-ïai ksar ban dawa na ka sorkar ba ka dei ban pyntreikam ïa ka ILP ha kine ki lum ki baieid eh ki jong ngi,” la ong u Bah Roy.
Shuh shuh u la ong ba kum ka seng kan ïengskhem ruh ba lada sa kumno-kumno ruh, ka jingpyrshah bad ka jingkhynra drok jong ka HYC kan dang ïai rhem bad bteng ha ki sngi bad ki por ban wan.
Na ka liang u nongseng ïa ka HYC, u Bah Peter J. Lawai u la ong ba ka jingthmu ba la seng ïa ka HYC ka long ban kyntiew, ban pynneh-pynsah bad ban ïarap na ka bynta ka imlang sahlang ha ki liang baroh.
U la ong ba ka jingeh kaba ka imlang sahlang ka ïakynduh ha kane ka por kaba mynta ka long ba ha ki bynta ban ïasnohkti lang ban weng ïa ki jingeh ka long kaba duna shaba palat bad ha ki kam ban mih shakhmat, ki kham bun ki nongkdew kti ban ïa ki nongaikti.
“Haba ngi peit ha ki bynta bapher-bapher, ngi ïohi ka jingïasnoh kti lang bad ka jingïashim bynta lang na ka bynta kumno ban weng ïa kine ki jingeh ka duna palat. Don tang katto-katne ngut lada phi peit ha ki shnong-ki thaw bad haba ngi peit ha ki bynta bapher-bapher ki ban mih shakhmat, bad ki kham bun kiba kdew kti ban ïa ki nongai kti,” la ong u Bah Lawai.
