Lima, Naitung:
Ki bor pynïaid ka Peru ha ka Sngi Palei ki la iathuh ba katei ka bus ka la leit hap ha kawei ka krem kaba don sha ka thaiñ Shatei Lam Mihngi jong ka Peru ha ka sngi Balang, ha kaba ki don kumba 26 ngut kiba la khlad ha katei ka jingjia, katkum ka khubor na ki ki pulit jong ka Andean kaba ju ioh mad bha ia ki jait jingjia aksiden kiba ha rukom.
Sa 14 ngut kiwei pat la ong ba ki la mynsaw bad ngat lang ha katei ka jingjia kaba la jia ha ka por mynstep jong katei ka Sngi Balang, la iathuh u heh ka tnad pahara surok-bah u Jhonny Valderrama haba iakren bad ki nongthoh khubor.
La ong ba katei ka bos ka kit kumba 40 ngut ki pasenjar bad ka mih na Lima ban leit sha ka thaiñ Andean jong ka Ayacucho hynrei ka la leit kylla noh katba ka dang poi ha ki bynta kliar lum kumba 200 meter (656 phut) ka jingjrong.
Napdeng jong kitei kiba mynsaw, 2 ngut ki dei ki nongñiah jong katei ka bos bad la pynkit noh ia ki mar-mar sha ka jaka sumar katba ki kynhun pyllait im ki dang trei shitom ban ioh sei bad pyllait im ia kitei kiba don hapoh baroh.
Kumta ruh la ong ba ki bahaïing-hasem jong kitei kiba mynsaw baroh, ki la leit ap da ka jingkyrmen ban iohsngew ia ka khubor kaba bha na ki bor pynïaid ka Mariscal Hospital ha Ayacucho, ha kaba la pynthiah ia kitei kiba mynsaw baroh.
Namar la ong ruh ba ki jingjia aksiden ha ki surok ka Peru ki long kiba khah-khah bad kiba shyrkhei ruh haduh katta namar jong ki lum, ki them ba kitei ki nongleit- nongwan ki hap ban iaid lyngba haba ki iaid ha katei ka thaiñ.
Ha u snem ba la leit, katei ka ri kaba don kumba 34 million ngut ki paid nongshong shnong, ka la duh palat 3,100 ngut ki mynsiem briew hapdeng ki 87,000 tylli ki jingjia aksiden kali.
Kumta, haba iadei bad katei ka jingjia ha kane ka kynti, u Myntri ka tnat Transport- u Raul Perez u la phah ia ka jingsngewlem sha ki bahaiing- hasem jong kitei kiba mynsaw bad kiba khlad ha katei ka jingjia baroh.
Watla ia ka daw jong katei ka jingjia ym pat lah ban tip shai, hynrei ki bor pynïaid bad ki pulit ki shu suba beit ba dei ka jingbym biang ka surok bad ka jingbym lah ban tehlakam jong ki nongñiah kali ha kum kitei ki surok kiba long ka jingsyier bad buh jingma ruh ia kito kiba thurmur ha ka laiñ ñiah kali.
