Shillong, Naitung 17
Ka lympung ïalehkai Under -20 Fourth Division Football League ba la pynïaid da ka Shillong Sports Association ka la nangjam shaphrang ha kaba ka Pynthorbah SC bad ka Laitkroh SC ki la khur ïa ka jingjop.
Ha kane ka jingïakhun kaba la long ha SSA Stadium, ka Pynthorbah SC ka la pynliem noh ïa ka Mawklot SC da 2-1 kol. Ka Mawklot ka la ïoh ban pynkhihjar nyngkong eh lyngba u Mebanpyn-shngaiñ Lyngdoh ha ka minit kaba 14, hynrei ka Pynthorbah ka la wanphai da ka jingkhlaiñ bor na ka bynta ban pynphai kylla lyngba u Raymond Kharkongor ha ka minit kaba 29 bad u Ronald P Lynting (70) na ka bynta ban khur syndon ïa ka jingjop.
Ha kawei pat ka jingïakhun, ka Laitkroh SC ka la pynliem noh ïa ka Them Rangshken ACC lyngba ka shi kol ba la thep da u Ipaïaskhem Kharkongor ha ka minit kaba 37.
Haba phai sha kawei pat ka jingïakhun kaba la long kham hashwa hapdeng ka Umrynjah SC bad ka Thynroit SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Kane ka lympung kan bteng biang ha ka sngi Palei ha kaba ka New Challenger SC pyrshah ïa ka Mawnianglah Youth SC ha ka por 11:30 mynstep, kumjuh ka Mawpdang SC ïa ka Mawlyngngad SC ha ka por 1:45 mynsngi, bad ka Umsohsun SC ïa ka Madan S&CC ha ka por 4 baje janmiet.
