Shillong, Naitung 17
Ka MP barim ka Tura, ka Agatha Sangma ka la tyrwa ban ai kyrteng thymmai ïa kawei ka surok ha Tura kum ka jingkynmaw burom ïa u Bishop George Mamalassery (Bam Kwai ha Dwar U Blei), Emeritus Bishop ka Tura.
Ka Sangma ka la tyrwa ban ai kyrteng thymmai ïa ka surok kaba sdang na ka Lad jong ka surok P.A. Sangma kaba ïalam sha ka Holy Cross Hospital kum ka jingburom ïa u Bishop Mamalassery kum ka dak ban kynmaw ïa ki jingsynñiang ba radbah jong u sha ka thaiñ.
Kumba ju tip da baroh kum u “Bishop Mama” khamtam da ki nongshong shnong ka Ri-lum Garo, u Bishop Mamalassery u la long uwei na ki ‘riewkhraw hapoh ka thaiñ – ha ryngkat ki jingsynñiang jong u sha ka imlang-sahlang, pule-puthi bad ka koit ka khiah naduh ki snem 1960.
Ka jingshakri jong u Bishop Mamalassery ha Ri-lum Garo ka la sdang kum u Mishonary ha ki snem 1960, kaba la ïalam ïa u sha ka bynta ban shimti kum u Bishop ka Tura. U la ieh noh shadien ïa shibun kiei-kiei ba kynthup ïa ka jingpynïeng ïa kiba bun ki shlem pule – katto-katne ki skul LP, 35 tylli ki skul M.E, 16 tylli ki skul Secondary, 2 tylli ki Higher Secondary bad 24 tylli ki Hostel kynthei bad 23 tylli ki Hostel shynrang kiba saphriang ha kylleng ka Ri-lum Garo.
Haba phai sha ka koit ka khiah, u Bishop Mamalassery u la seng ïa kumba 20 tylli ki ‘Dispensary’ bad ka Holy Cross Hospital ba 150 jingthiah ha Tura, ha kawei ka liang kaba kyntiew shi kat dei ïa ka jinglong-jingman ka koit ka khiah jong ki nongshong shnong ka Ri-lum Garo. Nalor kane, u la wanrah ïa ka Rino Simoneti Nursing School na bynta ki General Nursing bad 2 tylli ki ïingsah tymmen na bynta kiba duna ka ïoh ka kot, ba kynthup ïa kawei ha Tura.
Na bynta kiba duna dkhot met, u la khot sngewbha ïa ki Montfort Brothers ban pynïeng ïa ka Montfort Centre na bynta kiba duna dkhot met ha Danakgre.
Kumjuh, hapoh ka jingkyrshan jong u, ka Diocesan Social Service Center (Bakdil) ka la kylla long ka NGO ba kongsan kaba khmih ïa ka bha ka miat bad ki prokram pynkup bor ïa ki paidbah ha Ri-lum Garo.
“Kine ki long tang khyndiat eh na kiba bun ha kaba u la trei minot na bynta ki nongshong shnong ka Ri-lum Garo. Ym tang ïa ka Balang Katholik hynrei ïa ki nongshong shnong ka Ri-lum Garo – kin ïai sngewnguh ïa u na bynta kiei-kiei baroh kiba u la leh na bynta jong ngi. Nga sngew ba ngi dei ban ai burom bad pynpaw ka jingsngewnguh sha u da kaba ai kyrteng ïa ka surok kaba sdang na Lad jong ka surok P A. Sangma kaba ïalam sha Holy Cross Hospital ha ka kyrteng jong u. Kan long ka dak ka ban sah kynmaw bad ka jingai sngewbha kaba kit jingmut naba u dei u briew uba don bynta ha ka ban pynïeng ïa kane ka Hospital,” ong ka MP barim ha ka shithi sha u Deputy Commissioner ka West Garo Hills, u Jagdish Chelani.
Ka la ong ruh ba ka jingai kyrteng thymmai ïa ka surok kan ïahap shi kat dei ban kynmaw burom ïa ki kam jong u Bishop Mamalassery na ki nongshong shnong ka Ri-Lum Garo.
