Bangkok, Naitung:
U Myntri Rangbahduh ka Thailand- u Srettha Thavisin ha ka Sngi Palei u la bthah ia ki kynhun wad bniah ban wad bniah bad bud-dien hadien ka jingiap jong ki 6 ngut ki bar ri ha ka hotel hapoh Bangkok.
Hynrei ki pulit ha kine ki khyndiat sngi ba la leit, ki la kyntait halor ka jingkynnoh ba kitei ki 6 ngut ki dei kiba shah pyniap.
Kumta la ong ba u heh ka Metropolitan Police Bureau- u Thiti Saengsawang u la iathuh ba ha ka miet Sngi Ba-ar la lap ia ka metiap jong 3 ngut ki shynrang bad 3 ngut ki kynthei napoh ka kamra jong katei ka hotel ha Bangkok hynrei ia ka daw jong katei ka jingjia ym shym la don ba tip.
Hynrei, utei u heh pulit u la ong ba lehse katei ka jingjia ka lah ban long namar ka jingsniew ne jinglong bih jong ki bam- ki dih ba kitei ki 6 ngut ki ia dih- ia bam ha katei ka sngi.
Bad haba la peit thuh, ym shym iohi ban don kino- kino ki dak iakhun hapdeng kitei ki 6 ngut bad kumta la suba ba imat ka dei ka bam kaba ki la ioh bam, kaba long bih bad kaba la pynlong ia ki ban duh noh syndon ia ka jingim.
Haba iadei bad kane, u Thavisin u la bthah ia ka tnat tohkit bad ki kynhun wad bniah ban bud-dien sani bad ban wad bniah halor kaei kaba la jia ia kitei ki 6 ngut hapoh jong katei ka hotel, khnang ba kan long ka jingiada naka bynta ki paidbah hadien- habud.
