Guwahati, Naitung:
Ki pulit jong ka Assam ha ka sngi Ba-ar ki la pynïap ïa lai ngut ki lehnoh ha ka por ba don ka jingïasiat kaba jur bha ha Bhuban Hills jong ka Cachar hajan khappud Assam-Mizoram.
Ha kane ka jingïasiat kaba markylliang ki la don ruh lai ngut ki pulit kiba la mynsaw.
Ka jingïasiat ka la jia haba ka kynhun jong ki pulit ka Cachar ba la lamkhmat da u Superintendent of Police u Nomal Mahatta, ki la leit sha Bhuban Hills, bad lai ngut ki suba jong ka kynhun lehnoh Hmar kiba la shahkem ha ka step jong kane ka sngi ha Dhalai Ganga Nagar.
Kine ki lai ngut ki la leit da ka Autorickshaw. Ki pulit ki la ïoh ban kurup kawei ka suloi AK-47, kawei ka pistol bad kiwei pat ki tiar siat na ka kali kaba ki shong.
Kiwei pat ki lehnoh kiba la ïoh jaka rieh lypa ha kane ka thaiñ ki la hiar thma pyrshah ïa ka kynhun jong ki pulit.
Ha ka por ba ki lehnoh ki la siat ki pulit ki la pynphai kylla ha kaba nangne ka la mih ka jingïasiat kaba markylliang ha kaba kane ka jingïasiat ka la neh da kumba shi kynta.
Ha ka jingïasiat kaba markyliang, lai ngut ki lehnoh ha kaba arngut napdeng jong ki ki dei kiba na Cachar bad uwei na Manipur ïa kiba la shah ïalam ban set patok hadien ba la ïohkem ïa ki ki la shah siat ïap.
Ka Cachar distrik ka la pynkhlaiñ bha ïa ki jingpahara hadien kane ka jingjia, ha kaba ki kynhun shipai ki la pynlong ïa ka jingleit khynra lehnoh khnang ban ïoh ban siat ïap ïa kiwei pat ki lehnoh kiba dang sah ha kane ka thaiñ.
U Mahatta u la ong ba ki pulit ki la ïaibteng ban wanrah ïa ka jingsuk bad ka jingshngaiñ ha ka thaiñ bad ki la trei shitom khlem shongthait na ka bynta ban khanglad ïa kino kino ki jingjia basngewsih bad ki jingïakynad.
Ki nongshong shnong ki la pynpaw ka jingsngewkhia ha kaba ïadei bad ki jingjia ïakynad bad ki la kyntu ïa ki bor ba dei khmih ba kin pynkhlaiñ shuh shuh ïa ki bor pahara kum shi bynta ban buh jingshngaiñ na ka bynta jong ki.
