Shillong, Naitung 18
Ka Kong Sahila Pohtam kaba trei kum ka nongshet jingbam ha kawei restaurant ha Sylhet kaba dei kawei ka sor ha Bangladesh bad jngai kumba ar kynta sha Dawki lada ïaid da ka kali, ka la ïathuh ba ki don ki samla Khasi na Meghalaya kiba wan pule doktor ha Sylhet ki la hap ban leit sah sha ïing jong ki paralok hadien ba ka kynhun samla pule na Bangladesh ki la phah mih lut ïa baroh kiba sah hostel ha Bangladesh.
Ka la ïathuh ba kane ka jingïakhih ka la sdang jur bha naduh hynnin ka sngi ka 17 tarik mynta u bnai bad bteng mynta ka sngi da kaba khang ïa ka surok, ki ïew ki hat bad ki skul ruh. Ka la ïathuh ba ha Sylhet ruh ka la kynjah namar kane ka jingïakhih jong ki samla pule ka long ban dawa na ka sorkar Bangladesh ba kan pynduh noh ïa ka bhah thungkam tang ïa ki ksiew jong ki shipai kiba ïakhun ïa ka sorkar Pakistan ha u snem 1971 ban ïoh laitluid namar ki samla pule kiba la nang la stad kim ïoh kam shuh.
Ka Kong Sahila ka la ïathuh ba ka ju ïakynduh ïa ki Khasi kiba dei na Meghalaya kiba wan pule sha Sylhet haba ki wan bam ha restaurant ba ka trei namar ka sngewthuh tang da ka ktien haba ki ïakren paralok. Namar kata, ka kitbok ba ki samla pule kiba dei na Meghalaya kiba pule ha Sylhet bad Dhaka kin ïoh leit phai suk sha Meghalaya namar kam tip haduh katno kane ka jingïakhih kan neh.
Haba ïoh ban ïakren lyngba ka phone ïa u Bah Andrew Sohlamar uba sah mynta ha Bangladesh, u la ïathuh ba ka jingïakhih ha Bangladesh ka la ktah ïa baroh namar mynta ka sngi ki la pakhang lut ïa ki surok, ki ïew namar ka jingdawa na ka sorkar Bangladesh ba kan pynduh noh ban ai bhah ïa ki khun ki ksiew jong ki shipai kiba ïakhun thma ban pynïoh laitluid na ka jingsynshar ka Pakistan ha u snem 1971.
U la ïathuh ba ha kane ka jingïakhih ki kwah ba kane ka bhah kan kut noh tang ha ki khun jong ki shipai, hynrei kam dei ban bteng ha ki ksiew namar kan pynduh kam ïa ki samla kiba la dep ka jingpule.
Shuh shuh u la pyntip ba kine ki samla pule kiba ïakhih ki la phah mih lut ïa baroh kiba sah ha ki hostel bad kane ka la pynlong ïa ki samla Khasi kiba sah ha Bangladesh kin hap ban leit phai noh.
Haba kylli halor ki samla pule na Meghalaya kiba pule ha Dhaka, u Bah Andrew u la pynpaw ba um don jingtip eiei ïa ki samla kiba wan pule nabar ka ri Bangladesh.
