Agartala, Naitung:
Naba ka jingsuk ka la leit phai biang sha ka thaiñ Gandatwisa kaba hap hapoh ka Dhalai distrik jong ka Tripura, ha kaba la sakhi ba ki la don ki jingjia jong ki jingïakynad bad ki jingthombor ïa ki katto katne tylli ki ïing ha kiba bun ki thaiñ ha ka 12 tarik, Naitung, ka sorkar jylla ha ka sngi Balang ka la pynbna ïa ka song tyngka ban ai kum ka bai lutksan kaba T. 1.54 klur sha palat 165 tylli ki longïing kiba la shah ktah jur na ki jingïakynad.
Ha ka jingthoh ba la phah da ka Directorate of Information and Cultural Affairs, ka sorkar jylla ka la ong, “da kaba don jingsngew halor ka jingjia kaba dang jia shen ha Gonda Twisa, ka sorkar jylla ka la mang ïa ka jingïarap pisa na ka bynta ki briew kiba la shah ktah jur. Ïa ka pisa kaba la kot sha ka T. 6 lak la mang katum ka jingkwah jong u Kharagaram Reang, uba dei u kpa jong uwei u briew uba la shah pynïap ha ka jingïakynad ïa uba la tip kyrteng kum u Parameswer Reang. Nalor kane, ka sorkar jylla ka la mang ruh sa kumba T. 1 klur bad T. 54 lak na ka bynta ka jingïarap pisa sha ki 165 tyli ki longïing kiba la shah ktah jur. La dep ban ai ïa ka jingïarap pisa kaba T. 25,000 ha kaba la nang pynkiew sha man kawei pa kawei ka longïing kum ka jingïarap kaba kyrkieh sha ki lanot.”
Ka sorkar ka la ong ba la pynlong ruh ïa ka jingkhmih bniah na ka bynta ban ai jingïarap bad jingkyrshan sha ki ïing, ki dukan bad kiwei pat ki jingdon jingem kiba la shah pynjulor ha kaba ïa kane yn sa pyntreikam shen.
“Ki dkhot jong ki longïing kiba la sah ha ki jaka sah ba shipor ki la ïoh ïa ki jingïarap kiba man ka sngi ha ryngkat ki jingshah sumar. Mynta u District Magistrate bad u Collector jong ka Dhalai distrik ha ryngkat u Superintendent of Police ki la leit jurip bniah ïa ka thaiñ Gonda Twisa. Na ka liang ki bor pynïaid distrik, ha Dhalai ki la pyntip ba ki dukan, ki ïew ki la plie kumba ju long ha kaba la lah ban pynphai biang ïa ka shongsuk-shongsaiñ ha ka thaiñ,” la ong ka jingthoh.
