Shillong, Naitung 18
Ka khubor ba la ïohlum na ki pulit ka jylla lyngba ka ‘Website’ ka jong ki ka ïathuh ba ha ka 16 tarik Naitung, ki pulit ki la ïoh jingtip ba ka la don ka jingsuba ba uwei u rangbah ba la tip kyrteng kum u Barnen M Sangma, 51 snem ka rta, na ka shnong Sindapara kaba hap ha thanat Phulbari, West Garo Hills, u la shah pynïap ha ki briew ki bym pat lah ban tip.
Na ka liang ki pulit ki la leit shimti noh ïa ka met kaba sah jong utei u rangbah bad la pynkynriah sha Civil Hospital, Tura ban leh ïa ka Post-Mortem.
Ha kawei pat ka jingjia, kawei ka nongshong shnong jong ka nongbah Shillong ka la ujor ba ha ka 13 tarik Naitung, hadien ba ka la ïohi ïa kawei ka byrta lyngba ka Instagram kaba khot ïa ki briew ban trei na la ïing, ka la thep pisa T. 18,810. Hynrei hadien katto katne por, ka la sngewthuh ba ka la shah shukor.
Shuh shuh ki pulit ki la ïathuh ba ha ka 17 tarik Naitung ha ka por kumba 10:20 mynmiet, ki runar ki la tuh ïa kawei ka Laptop na ka kali Hyundai Grand i10 (ML-05X-7874) ha Mawroh, Shillong.
