Shillong, Naitung 18
Ka tnat ïalehkai jong ka Sorkar Jylla ka la thung ïa ka kynhun tohkit pyrshah ïa ka Meghalaya State Karate Do Federation (MSKDF) hapoh ka jingïalam u Bah Donny Raphael Ranee, kaba la shah kynnoh dawa pisa na ki khynnah ïalehkai hadien ba ki la ïoh ïa ka baibam (scholarship) na ka tnat ïalehkai jong ka Sorkar Jylla lyngba ka jinglah ka jong ki ban pynpaw ïa ka jingtbit ha ki kam ïalehkai da kaba khur takma ha ki lympung ïalehkai bapher bapher.
Katei ka tnat ka la jied ar ngut ki ophisar jong kane ka tnat lem bad ar ngut pat kiba dei ki dkhot nongïa-lam ka Meghalaya State Olympic Association (MSOA) ba kynthup ïa u President lem bad u General Secretary ki ban don hapoh katei ka kynhun na ka bynta ban tohkit bniah halor ka jingdon kti katei ka synjuk ha ki kam dawa pisa na ki khynnah.
“Ha ka jingshisha naduh kaba sdang ngim shym la ithuh ïa ka MSKDF namar ka la don lypa ka AMKA ïa kaba ka la ïoh jingithuh naduh ki phew snem ba la lah. Hynrei dei ka Sorkar kaba la shim ïa ka jingithuh hi da lade ïa ka MSKDF, hynrei mynta ka la poi ha ka khim khait bad ka la khot ïa ngi ban ïadon bynta lang hapoh katei ka kynhun tohkit,” la pynpaw u General Secretary u Bah Finely Pariat hadien ba la kut ka jingïalang ka Executive Committee jong kane ka synjuk ha ka Sngi Palei.
“U Bah Donny u dei dkhot hapoh ka MSOA namar u la mihkhmat na ka Meghalaya Wushu Association, hynrei na ka daw ba u la pynjah burom ïa ka synjuk hi baroh kawei, te kumta ka MSOA ka la shimti ïa ka rai ban ai por hynñiew sngi ba un ai ïa ka jubab lym kumta ka MSOA kan weng noh shi syndon ka jingithuh ïa u na kane ka synjuk bad kane kan treikam naduh ka Sngi Thohdieng mynta ka taïew,” u la bynrap.
Ha kawei pat ka liang ka Secretary ka tnat ïalehkai jong ka Sorkar Jylla ka Kong Isawanda Laloo ka la pynpaw ba na ka liang ka tnat ka la ïohpdiang ïa ka jing-ujor na ki kmie jong ki khynnah halor katei ka jingdawa pisa ka MSKDF bad na ka liang ka tnat kan shim khia halor kane ka bynta.
“Ka Sorkar kan shim khia ïa katei ka jingujor bad ka la ong ruh ba na ka liang ka tnat kan sa leh eiei halor kane ka bynta namar kane ka la ktah bha ïa ki khynnah ïalehkai kiba la trei shitom ban wanrah burom ïa ka Jylla hi baroh kawei.”
Lah ban pynkynmaw, dangshen ki kmie jong ki khynnah ki la leit ujor syndon sha ka shlem treikam jong ka tnat ïalehkai ka Sorkar Jylla lem bad ka Meghalaya State Olympic Association (MSOA) pyrshah ïa u Bah Donny. La kynnoh ba katei ka synjuk hapoh ka jingïalam u Bah Donny ka la dawa ruh na ki khynnah ba kin hap ban ai 10% na ka 100 jong ka khusnam pisa (Cash Award) bad sa T. 500 tyngka na ka scholarship kaba ki khynnah ki ju ïoh na ka Sorkar Jylla lyngba ka tnat ïalehkai.
