Shillong, Naitung 18
Ïa ki trophy jong ka lympung ïalehkai 133rd Durand Cup 2024 la pyllait paidbah ha ka Sngi Palei ha kane ka nongbah ka ban ïashim bynta da 24 tylli ki kynhun ïalehkai jong ka Indian Super League, I-League, ki kynhun ïalehkai Phutbol jong ki shipai lem bad ar tylli na ki ri marjan.
Ha kane ka prokram kaba la long ha U Soso Tham Auditorium, Shillong, la pynïaid da ka Eastern Command jong ka kynhun shipai ryngkew ha ryngkat ka jingïatrei lang bad ka Sorkar Jylla ha kaba la ïadon lang u Myntri Rangbah ka Jylla u Conrad K. Sangma, kumjuh u Myntri ka tnat ïalehkai u Bah Shakliar Warjri, ha ryngkat ka jingdonlang u Lt Gen Sanjay Malik, GOC ka 1O1 Area, u Maj Gen Rajesh A Moghe, VSM GOC Bengal Sub Area bad uba long u Vice Chairman ka DCOC, kumjuh u Lt Col Vikram -sinh Chudasama (LOC, DCOC), u Director ka tnat ïalehkai u D.D Shira bad kiwei kiwei.
Ha ka nongbah Shillong yn pynlong tang ka jingïalehkai jong ka Group-F kaba kynthup ïa saw tylli ki kynhun, kita ka Shillong Lajong FC, ar tylli ki kynhun ïalehkai jong ka Indian Super League, kita ka Hyderabad FC bad ka FC Goa lem bad kawei ka kynhun shipai na Nepal, ka Tribhuvan Army FC.
Wat la ïa kane ka lympung yn sdang naduh 27 tarik u Naitung 2024 ha Kolkata, hynrei ka Lajong kan ïakhun nyngkong eh ïa ka Tribhuvan Army FC ha ka 2 tarik u Nailar 2024 ha JN Stadium, Polo.
