Shillong, Naitung 18
U Lt Gen ka GOC 1O1 Area, Sanjay Malik u la pynpaw ka jingïaroh ba ka jingmaramot pynbha ïa ka madan ïalehkai phutbol ha Jawaharlal Nehru Stadium kaba don ha Polo ka la long kaba biang eh ha kaba wat hadien ka jingther jong u lapbah ba jur, hynrei tang hadien ba la rang ym ïohi shuh wat tang shi jaw ka um ha katei ka madan.
Ïa kane ka jingmaramot la shim khia da ka Sorkar Jylla naduh u snem 2022 da kaba kylliang noh na u phlang plastic sha u phlang ba shisha ne natural grass, nalor kiwei ki jingmaramot pynbha ïa ka stadium hi baroh kawei kaba kynthup ïa ki jaka shong ki nongpeitkai ki jaka khreh ki nongïalehkai bad kiwei kiwei.
Haba pynpaw ha ki lad pathai khubor ha ka sngi Palei, u Malik u la ong, “Katei ka madan ha JN Stadium ka long kaba biang bha ban ïalehkai namar wat hadien ka jingther u lapbah uba jur, hynrei tang hadien ba la rang ym ïohi shuh wat tang shi jaw ka um ha katei ka madan.”
“Kum ka kynhun shipai kaba pynïaid ia katei ka lympung, ka ialeh ban peit bha ïa ka jinglong jingman ka madan ïalehkai bad kan ym tuklar eiei ïa ka athletic track namar kane ka lah ban nangshim por ban pyndep,” u la bynrap da kaba pynpaw ïa ka jingkhmih lynti ba kane ka Stadium kan long kaba biang nadong shadong hashwa ka 2 tarik u Nailar ha kaba ka Lajong kan ïakhun nyngkong pyrshah ïa ka kynhun shipai kaba na Nepal, ka Tribhuvan Army FC.
Ha kawei pat ka liang ka Secretary ka tnat ïalehkai jong ka Sorkar Jylla ka Kong Isawanda Laloo ka la pynpaw ba ka jingdie ïa ki tiket jong ka Durand Cup na ka bynta ka Group-F ka la sdang mynta ka Sngi Palei ha kylleng ka lyngba ka online bad offline.
