Imphal, Naitung:
Ha ka jingpyntreikam halor ka jingthmu ban tehlakam ïa ki kam pyntriem kiba long pyrshah ïa ka imlang-sahlang, ki shipai ïada ri ha ka Sngi Palei ki la thmu ban thom pyrshah ïa ki san tylli ki ktem jong ki lehnoh bad ban pynlong ïa ka jingleit khynra ha ka thaiñ kaba shah ktah jur na ki kam pyntriem ha Manipur bad ïoh ruh ban kurup ïa ki tiar siat, ki tiar pynbthei, ki bom bad kiba bun ki tiar ba ju pyndonkam ha ka ban hiar thma.
Ki shipai jong ka sorkar pdeng bad ki shipai jong ka jylla kiba la ïasnohktilang ki la don bynta ban leit thwet bad leit khynra ha kiba bun ki jaka kiba don ha ki shnong kiba kynthup ha Khongyam Heirikokthong bad Moltingcham ha Kakching distrik, ha Tuibong bad sha ki jaka ba marjan, ka Churachandpur distrik bad ka shnong Takhel bad sha ki lum Teraphai/Tuisenphai, kiba don ha Imphal East District. Haduh ba la thoh ïa ka khubor ym pat kem ïano ïano ruh ha kaba ïadei bad ka jingjia.
Ha ka jingleit khynra, kumba la sakhi, la ong ba na ka thaiñ Khongyam Heirikokthong, ka Kakching distrik, ki shipai ïada ki la ïoh ban kurup kawei ka Carbine ha ryngkat u Magazine, 2 tyli ki suloi Air Gun, 9 tylli ki bom kawang kti HE-36, 4 tylli ki Detonator jong u bom HE-36, uwei u Mortar Shell ba 2 inshi, uwei u HE 2. -inshi, 48 tylli ki synduk thylli, 3 tylli ki Anti-Riot Double Blast, 2 tylli ki Baofeng Set ryngkat ki Battery, 6 tylli ki bom pynsat khmat, uwei u INSAS LMG Magazine, 20 tylli ki snep kuli, 13 tylli ki song kuli, 36 tylli ki synduk thylli bad kiba bun kiwei pat ki tiar pyndonkam.
Naduh ka shnong Moltingcham, Kakching District ki shipai ki la ïoh ban kurup kawei ka suloi shna hi, 2 tylli ki Baofeng Handsets, uwei u bom kawang kti na China, uwei u Pistol Magazine, 2 tylli ki jaka Charge Magazine .303, uwei u shabi jong u bom kawang kti, uwei u Motor Wi Shell kaba heh 2 inshi, 37 tylli ki synduk kuli bathylli, 2 tylli ki “Pompy Launcher” ba la shna ha kane ka thaiñ bad kiwei pat ki tiar siat.
Na Tuibong bad ki jaka bamarjan, na Churachandpur distrik ki shipai ki la ïoh ban kurup 2 tylli ki Pumpi ba la pynkylla dur bad kawei ka suloi SBBL (12-bore). Shuh shuh na ka shnong Takhel bad na ki lum Teraphai/ Tuisenphai, Imphal East District ïa kawei ka suloi .303 ryngkat u Magazine, kawei ka Carbine ryngkat u Magazine, 15 tylli ki kuli bym pat pyndonkam, 2 tylli ki HE-36 Hand Grenade, kawei ka WP Green colour no. 80 tylli ki bom Mark-1, kawei ka pistol, bad 49 tylli ki kuli thylli la ïoh ban kurup. Ïa kine ki tiar siat bad pynbthei ba la ïoh ban kurup la aiti sha ki pulit ka Manipur na ka bynta ban leh ïa kaba donkam.
