Imphal, Naitung 19
Ki pulit ka Manipur ki la kem ïa khyndai ngut ki briew, ba kynthup ïa uwei u nongtrei sorkar ha ka kyrdan Lower Division Clerk (LDC) ka tnat Labour, halor ka jingkynnoh ba ki la donkti ban ai da ki kot kiba thok ha kaba ïadei bad ka Inner-Line Permit (ILP).
Katkum ki khubor ba la wan na Manipur, la ong ba ka jingtohkit ba dang sdang da ki pulit ka pynpaw ba ka jingai ïa ki ILP ba shu shna thok ka la kot sha kumba 3,500 eiei.
Na ka liang ka sorkar ka la thung da ka Special Investigation Team (SIT) ban pynlong da ka jingtohkit kaba bniah bad yn pynshitom da kaba tyngeh ïa kiba donkti. Ha kaba ïadei bad katei, na ka liang ki pulit ki la dep ban pynrung da ka FIR.
U Myntri Rangbah ka Manipur, u N Biren Singh, u la pynbna sha ki lad pathai khubor halor ka jingkem ïa ki khyndai ngut ki briew kiba donkti ban ai ïa ki ILP kiba shu shna thok.
Ka jinglap ksai halor katei ka jingai ïa ki ILP ba shu thok ka la sdang hadien ba u Joint Secretary (Home) bad uba dei peit ïa ka ILP Cell ha ka tnat Korbar Jylla u la ïoh jingtip halor ka jingdon jong ka jingai ïa ki ILP kiba thok bad ka jingdie ïa ki kot ILP ba shu shna thok.
Ka jingtohkit ba dang sdang ka la lap ïa ka jingdonkti jong ki nongtrei sorkar bad ki mynnong da kaba shim pisa na kiba pan ILP bad la ai kylla sha ki pat da ki ILP ba shu shna thok.
Na ka liang ki pulit bad kiwei ki tnat ki la pynlong da ka jingkhynra ha ka 18 bad 19 tarik Naitung ha ki san tylli ki jaka ba kynthup ïa kawei ka Computer Centre ha Namdunglong bad ka jaka maramot ïa ki Mobile Phone ha Kakhulong, ka jaka die Mobile Phone ha Thangal Bazar, Computer Centre hajan ka Bapupara DC Bungalow Office Gate bad ka khyrdop jong ka Cecil Laborator ha RIMS Road.
Ïa kitei ki jingkhynra la lamkhmat da u Dr. Mayengbam Veto Singh, Joint Secretary (Home), bad la ïoh ban kurup shibun tylli ki kor kompiwtor, Laptop, ILP ba shu shna thok, Aadhaar Card bad kiwei-kiwei.
Haduh mynta, ka jingtohkit ka la shem ba la dep ban ai kumba 3,500 tylli ki ILP ba la shu shna thok lyngba ki san tylli ki jaka.
Ka jingdon be-aiñ ïa ki ‘pass’ ILP da kine ki san tylli ki jaka bad ka jingïadei ka jong ki bad ki nongtrei sorkar na Imphal West bad Imphal East District bad ka tnat Labour ka pyni ïa ka jingdon jong ka jingïadei kaba khlaiñ kaba lam ruh sha ka jinglum pisa tam na ki briew kiba pan ILP.
