Shillong, Naitung 19
Ka Kynhun Myntri jong ka Sorkar Jylla ka la ai jingmynjur ïa ka kompani Varun Beverages ba kan seng bad bei pisa haduh T.300 klur ban buh ïa ka karkhana pynmih Pepsi kaba dei kawei na ki kynja jingdih pyngngad.
Haba ïathuh ïa kane hadien ba la wai ka jingïalang jong ka Kynhun Myntri ha ka Sngi Thohdieng, u Myntri Rangbah u Conrad K Sangma u la ong ba kane ka karkhana kan treikam na ka jaka hapoh Mendipathar Industrial Zone bad ka dei ka karkhana kaba nyngkong eh hapoh ka thaiñ.
Kiwei pat ki karkhana kiba la dep don baroh shikatta snem ki kynthup ha EPIP Byrnihat bad Industrial Area ha Umïam.
U la ong ba ka kompani ka jied ïa kane ka jaka ban seng ïa kane ka karkhana ban shna bad pynmih ïa ki kynja jingdih pyngngad ka dei namar ka jingdon ka lynti rel ha Mendipathar bad ka jaka dei kaba la soi soskular ban shimwai kumba 30 snem.
U Conrad u la batai ruh ba namarba kane ka karkhana ka dei kaba ka rukom bei pisa ka long palat T.100 klur ki la don lypa ki don ban ïoh ïa ki kynja jingkyrshan kum ka capital investment subsidy, interest subvention, nalor ka GST bad kiwei kumba la kdew ruh ha ka policy jong ka Sorkar Pdeng.
U la ïathuh ba 90 na ka 100 ka jingai kam kan dei ïa ki trai muluk ha kane ka karkhana ha kaba ïadei bad ki kam ki bym da dei eh kiba donkam ka jingtbit kaba kham kyrpang ban pynïaid ïa ki kam ki jam.
Ha kawei pat ka liang, ka Kynhun Myntri ka la ai jingmynjur ruh ban ai kyrteng ïa ki surok bad ki ïing Sorkar bapher bapher ha ka kyrteng jong ki katto katne ki ‘riew pawkhmat kynthup ïa ka surok ka ban leit sha Holy Cross Hospital ha Tura ha kaba yn ainam ha ka kyrteng u Bishop ba la khlad noh, u Bishop Mamalassery, uwei na ki nongïalam niam uba paw ha Garo Hills nalor ka jingpynkylla kyrteng ïa ka Raitong Building sha u Lumshyllong Building ka GNM Nongpoh yn tip noh kum ka GNM School of Nursing Pahamsyiem bad kiwei kiwei ki surok kynthup ha Baghmara.
