Shillong, Naitung:
U President ka Hynñiewtrep Achik National Movement (HANM) South West Khasi Hills District Mawkyrwat, u Bah Lambokstar Marweiñ u la pynpaw ïa ka jingsngew duh jingkyrmen ïa ka sorkar Meghalaya hadien ba la ïohi ïa ka jingpyni bor jong ki shipai BSF na ka por sha ka por ïa ki nong Meghalaya khamtam ïa ki paidbah nongshong shnong kiba don ha ki bynta khappud kiba ju mad jingeh haduh katta-katta.
U Bah Marweiñ u la ong ba kine ki shipai ïada ri ne ki BSF ki thmu leh donbor ïa ki para nong India bad kim ju nud satia ban ai ka jingïada na ka jingwan rung tuh ki nong Bangladesh kiba thmu ban wan ïuh-kjat shapoh ka India.
“Kumta nga kum u shipai barit jong ka Jaitbynriew, nga pynrem jur ïa ka sorkar Meghalaya na ka por sha ka por bad ngi dawa na ka sorkar ban ai jingmaham ïa kine ki BSF ba kim dei ban leh tohmet ïa ki paidbah nongshong jong ka jylla Meghalaya kiba la mad ïa ka jingsohsat na ka daw ka jingpynwit bad jingpynthut jong kine ki shipai BSF”, la ong u Bah Marweiñ.
U Bah Marweiñ u la ong ba kiba bun ki ‘riew paidbah ki la ïap ha ki kti bad ki ktang suloi jong ki BSF hynrei kane ka sorkar Meghalaya pat ka la leh kyllut bad kam pynsngap satia ïa ki shkor haduh mynta mynne ïa ka jingud-jingnam jong ki paidbah halor kane.
Halor ka jingïai leh kyllut jong ka sorkar jylla ban leh eiei ïa ki shipai BSF kiba long ki nongpynthut bad ki nongpynwit ïa ki paidbah ha ki thaiñ khappud, u Bah Marweiñ u la ong ba lada ka sorkar jylla kam shimkhia eiei halor kane ka jingud-jingnam ki paradoh-parasnam na ki thaiñ khappud, kum ka seng kan wer lang ïa baroh ki paidbah nongshong shnong bad ki sengbhalang bapher-bapher ban pyni noh da ka bor ïa ki shipai BSF ne ïa ka sorkar jylla namar kan sa poi ka por ba ki paradoh-parasnam ha ki thaiñ khappud kin sa shuh pynïap klep uwei hadien uwei ha kine ki shipai BSF.
“Ngin ïawer lang ïa baroh ki paidbah nongshong shnong, ki sengbhalang bapher-bapher ba ngin pynibor sa mangi ïa ki BSF lane ïa ka sorkar Meghalaya lym kumta ki paidbah nongshong ba hap ha ki thaiñ khappud kin sa shah pynïap klep uwei hadien uwei bad nga da kyntu jur ïa ki riew rangbah kiba don ka jingkitkhlieh ba ki dei ban ïa kren lem shaphrang kane ka mat kaba ktah wat ïa ki mynsiem ba kordor jong ngi”, la bynrap u Bah Marweiñ.
