Shillong, Naitung 19
Sa kumba 40 ngut ki samla pule na Meghalaya kiba pule ha Eastern Medical College ha Bangladesh ki la pynkhreh ban wanphai noh sha la ka jong ka ri lyngba ka jylla Tripura.
Katkum ka khubor ba la ïohlum na ka sorkar jylla ha ka Sngi Thohdieng, la ong ba ki don kumba 128 ngut ki samla na India, ba kynthup ïa 40 ngut na Meghalaya, kiba pule ha ka Eastern Medical College ha Bangladesh, bad kine ki la pynkhreh ban mih noh na kane ka shlem bad ban wan sha India da ka bos lyngba ka Sonamura kaba don hajan ka nongbah Agartala ha Tripura.
Kine 40 ngut na Meghalaya ki kynthup ïa 30 ngut ki samla kynthei bad 10 ngut ki samla shynrang.
Hynrei la ïathuh ba na ka liang ki bor ba dei khmih jong katei ka shlem ai jinghikai ki la rai ban pynlong shwa da ka jingïalang ha ka step Sngi Saitjaiñ ban ïa pynbeit ïa ka rukom leit phai jong kitei ki samla pule bad kumjuh ruh ban pynbiang ïa ki lad pahara.
Ha ka jingshisha, kitei ki samla pule ki la thmu ban sah shwa ha Agartala haduh ka Sngi U Blei, bad lada ka jinglong-jingman ha Bangladesh kam pat thanda, kin leit shwa sha la ki jong ki shnong ki thaw.
