Shillong, Naitung 19
U Myntri Rangbah ka Jylla, u Conrad K. Sangma ha ka Sngi Thohdieng u la pynshai ba ka jingpyntreikam ïa ka MRSSA ka la ïaid shakhmat wat la ka jingtyllun kam haba ïadei bad kane ka bynta ka kham suki ha katto-katne ki distrik.
“Haba ïadei bad ka jingpyntreikam ïa ka MRSSA jong u snem 2016, ngi la pyntip sha ki (kynhun seng) ba ka jingpyntreikam ka la ïaid shakhmat. Lada ngi ïakren ïa kane, ki shnong bapher-bapher ha Shillong – ka don ka jingpynrung kyrteng, la thaw ïa ki komiti bad kumta ka jingkylli halor ka jingbym pyntreikam ïa ka MRSSA, 2016 kam don satia,” la ong u Sangma haba kren sha ki lad pathai khubor.
Haba ban biang ba la pyntreikam ïa ka MRSSA, u Myntri Rangbah u la ïathuh ba la dep thaw ïa ki komiti, wat la ki lah ban don katto-katne ki distrik ha kaba ka jingtyllun kam, kam da sted kumba long ha kiwei pat (ki distrik).
“Hynrei ban ong ba khlem pyntreikam ïa ka MRSSA, kane ka long kaba bakla,” u la ong.
Haba phai sha ka jingïakynduh jong u bad ka KSU ha kane kajuh ka sngi, u Sangma u la ong, “Ngi la pynshai halor ki jingpynsngew na ka liang jong ki. Nga la dep batai halor ka mat ba ïadei bad ka ‘Work Permit’ ba ym don kyndon hapoh ka aiñ haba phai sha ka ‘Work Permit’, ym don kyntien ‘Work Permit’.”
Haba kren shaphang ka jingpynbna kaba pyndonkam ïa ki kyntien ‘Work Permit’, u la ong hadien ka jingmih jong kane ka jingpynbna, la pynshai ba ki kyntien ‘Work Permit’ ki kdew ïa ka jingpyntreikam ïa ka aiñ Inter-State Migrant Workmen Act.
“Kumta kane ka jingpynbna ka la pynmih ïa ka jingpynshai kaba ong ba ki kyntien ‘Work Permit’ ki mut ka jingpyntreikam ïa ka Inter-State Migrant Workmen Act ka bym don kyndon na bynta ka ‘Work Permit’ hynrei ka don kyndon na bynta ka jingpynrung kyrteng ïa ki nongbylla ba la leh da ki kontraktor ne nongai kam – lada ki don 5 ngut ne palat ki ban wan sha ka Jylla, kin hap ban ïaid lyngba kane ka aiñ bad pynrung kyrteng,” u la ong.
Haba kylli, u la kren shai ba ym don mano-mano kiba lah ban khynra bad kumba ka long, ki la don 10 tylli ki mukotduma pyrshah ïa ki kynhun seng bapher-bapher bad ki ‘riew shimet kiba don bynta ha kitei ki kam.
“Uno-uno uba leh ïa kane, ne kano-kano ka kynhun seng kaba leh ïa kane, ka aiñ kan sa leh ïa kaba donkam,” la ong u Myntri Rangbah.
Shuh shuh u la bynrap ba ka kamram ka Sorkar ka long ban pyntikna ïa ka jingpyntreikam jong ka aiñ bad haba don kum kine ki jingjia, ka aiñ kan sa leh ïa kaba donkam bad lada don mano-mano uba pynkheiñ ïa ka aiñ, kata ka aiñ kan sa leh ïa kaba donkam.
Na ka liang u Myntri Rangbah u la ïathuh ruh ba ha ka jingïakynduh ba dang shen jong u bad u Myntri ka tnad Kam Pohïing ka Sorkar Pdeng, u Amit Shah ha Delhi, u la pynsngew ha u halor ka Khyrnit ba 8, ILP bad MRSSA bad kumba ka long mynta, ka tnad ka dang eksamin ïa kine ki mat.