Shillong, Naitung 21
Ka HYC-Sengkmie hapoh ka jingïalam u Secretary, Bah Isaac Basaïawmoit ha ka jingsynran lang u Vice-President, Bah Donboklang Kharlyngdoh ka la bteng ban khynra ïa ki nongdih drok ha ki jaka paidbah ha ka miet jong ka Sngi Saitjaiñ naduh ka por 5 baje janmiet bad ka la pynkut haduh ka 1:30 baje jong ka step Sngi U Blei.
Ha katei ka jingkhynra, la ïoh bat kumba 20 ngut ki samla Khasi bad kumjuh ki bar jylla.
Ka seng ka la sdang ïa kane ka jingkhynra na ki thaiñ Polo ter-ter sha Motphran, Ïew Mawlong, haduh Stand Bhoi.
Ha kane ka miet, ka seng la ïoh ban bat lang bad nongdih bad nongdie ha ryngkat 15 tylli ki CC (tyndong thep drok), ka kyiad, ka biar, u kynja, ka tari bad ka pisa.
Hadien ba la dep kurup, na ka liang ka seng, ka la thang syndon ïa kitei ki drok ha ka step Sngi U Blei hakhmat jong ki hi.
Ha kane ka jingkhynra kaba la neh kumba 8 kynta shiteng eiei hadien ba la ïoh bat, la phah wan lang ïa ki bahaïing jong kitei ki khynnah. Napdeng kitei 20 ngut, 3 ngut ki khynnah la ïalam syndon da ka jingmynjur jong ki kmie ki kpa sha ‘Rehabilitation Centre’ kaba don ha Assam.
U Bah Isaac Basaïawmoit u la ong wat hapdeng ka jingïai khot hajir jong ki bor ka aiñ ïa ki nongïalam ba hakhmat kum halor ka mat Lum Survey, drok, ka seng kan ym rieh ne tieng hynrei kan ïai bteng ban khynra drok namar ka seng ka tip shai ba lada duna ki nongdih bad nongdie drok, ki kam sniew ruh ki duna hangne hapoh ka Jylla.
Kane ka long katkum ka kyrwoh na u Publicity Secretary ka seng, Bah Bashan Lyngdoh Mawnai.
