Agartala, Naitung:
U MP jong ka seng Congress ha Assam u Gaurav Gogoi u la ai da ka jingsneng kaba tyngeh ïa ka sorkar Bharatiya Janata Party (BJP) ha Tripura, kaba hapoh ka jingïalam jong u Myntri Rangbah ka jylla u Manik Saha, ha kaba ïadei bad ki jingjia bashyrkhei ba dang shen hashwa ban pynlong ïa ka ilekshon Panchayat ha u bnai ban wan ha kane ka jylla.
U Gaurav Gogoi u la ïai ban da kaba ong ba ka Congress kan khanglad ïa ka Tripura ba kan poi sha ka jingkulmar kumba long ha Manipur.”Ka Tripura ka sakhi mynta ïa ka jingkhyllem jong ka synshar paidbah. Ki nongïalam bad ki nongbud jong ka seng BJP ki la pynjur ïa ki kam thombor bym lah ban pdiang pyrshah ïa ki nongbud bad ki nongkyrshan jong ka seng Congress.
Kumba la sakhi, la ong ba ka la don ka jingpynpra ïa ki ïing ki sem, ynjulor ïa ki mar ki mata, bad kem be-aiñ ruh ïa ki briew ki bym leh kam beaiñ. Wat ki khynnah ruh kim lait na ka jingshah thombor,” la ïathuh u Gaurav Gogoi, u symbud nongïalam jong ka seng Congress ha Lok Sabbha.Kane ka jingkren ka long hadien ka jingwan jngoh jong u sha ki jaka ba shah ktah ha ki kam thombor jong ka jylla ryngkat bad ka kynhun jong ka seng.Ha ka jingïakren bad ki lad pathai khubor u Gogoi u la pynksan ïa ka jingïatylli jong ka seng bad ki dkhot jong ka ha kine ki por ba ka jylla ka ïakynduh jingeh.
“Ka Congress kan nym pymdem ha ki buit pyntriem jong ka BJP”, u la ong. U la maham halor ki jingkulmar ha Tripura ha kaba kane ka pyni ïa ka jingpyrshang ban pynkylla ïa ka Tripura sha ka “Manipur kaba ar”. U batai shai halor ki jingïakynad jaidbynriew ba la jia ha Manipur naduh u bnai Jymang, 2023, kiba la wanrah ïa ka jingïap jong ki briew ym duna ïa ka 220 ngut, kynthup ïa ki bor pahara bad ki shipai ïada.
