Jowai, Naitung 21
Ka Royal Pole Mihmyntdu, ka Da-i-hi Mynsngat ki la ïoh jingjop katba ka West Madan Mustem, Kyndongtuber, Moodymmai bad Pammanik ki la kut noh ha ka jingïakhaid ha ka jingïalehkai 4th Adelbert Laloo Memorial Trophy-3rd Division Football Tournament.
Ïa kane ka jingïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium, Jowai ïa kaba la pynlong ha ka sngi Saitjaiñ.
Haba phai sha ka jingïalehkai, ka jingïakhun hapdeng jong ka West Madan Mustem pyrshah ïa ka Kyndongtuber kala kut noh ha ka jingïakhaid khlem da don kiba la ïoh ban pynkhih jar.
Haba phai pat sha ka jingïalehkai kaba la long hapdeng ka Moodymmai pyrshah ïa ka Pammanik, kane ruh ka jingïalehkai ka la kut noh ha ka jingïakhaid hadien baroh ar liang ki la ïoh ban khyrwit mar shi kol.
Ha ka jingïakhun kaba bud, ka Royal Pole Mihmyntdu kala lah ban pynliem noh ïa ka Nangbah Khlopano da 1-0 kol. Ïa kane ka kol jong ka Royal Pole Mihmyntdu la thep da u Dayomiki Ryngkhlem ha ka minit kaba 55.
Ha kawei pat ka jingïakhun, ka Da-i-hi Mynsngat kala pynliem noh ïa ka Dongnein Sohmynting da 4-0 kol. Ïa kine ki kol jong ka Da-i-hi Mynsngat la thep da u Deepson Tokbi ha ka minit kaba 15 & 49 bad u Carlus Hadia ha ka minit kaba 31 bad 33.
