Shillong, Naitung 21
Ka komiti ka Congress haba ïadei bad ka ilekshon shiteng samoi ha Gambegre ka lah ban shong jingïalang mynta ka taïew ban ïakren halor kane ka bynta.
“Ïa mynta, ka komiti ka la don bad la pynskhem ïa ka bad ka lah ban shong jingïalang mynta ka taïew,” la ong u Secretary ka Meghalaya Pradesh Congress Committee (MPCC), Bah Manuel Badwar.
Ha kajuh ka por, u la ong ba ïa mynta, ka seng kam pat rai eiei halor katei ka bynta bad kan ap tad ynda ka komiti ka la shong shuwa ïa ka jingïalang.
Kum ban shu kdew hangne, ka konstitwensi Gambegre ka la sah thylli namar ka jingieh noh kam jong u MLA ka Congress, u Saleng A. Sangma ha ka 10 tarik Jylliew mynta u snem hadien ba u la shah jied kum u MP ka Tura Parliamentary konstitwensi ha kane ka ilekshon ba la dep sha ka Lok Sabha.
Hynrei kumba ka long, ka Election Commission of India (ECI) kam pat pynbna ïa ka tarik na bynta ban pynlong ïa ka ilekshon shiteng samoi jong ka Gambegre.
Ïa kane ka ilekshon shiteng samoi hap ban pynlong hapoh hynriew bnai bad kumta ka lah ban long ha kano-kano ka por mynta u snem.
Katkum ki khubor kiba la mih, la ong ba ka National People’s Party (NPP) ka la ai jingmut ban pynïeng da ka kurim u Myntri Rangbah ka Jylla, ka Mehtab Chandee Sangma ha kane ka ilekshon shiteng samoi ban wan.
Ha kajuh ka por, ka Trinamool Congress (TMC) ka lah ban pynïeng da ka kurim u Zenith Sangma – ka Sadhiarani M. Sangma ha kane ka ilekshon shiteng samoi. Hashuwa, ka Sadhiarani ka la ïakhun arsien na kane ka konstitwensi hynrei ka la shah rem noh tang khyndiat ‘vote’.
Ka Sadhiarani kaba dei ruh ka MDC ka Dengnakpara konstitwensi ka la ïakhun ha ka ilekshon sha ka ïingdorbar thawaiñ ka Jylla ha u snem ba la dep na Gambegre konstitwensi pyrshah ïa u Saleng Sangma bad shah rem noh da 2,871 ‘vote’. U Saleng u la ïoh 11,252 ‘vote’ katba ka Sadhiarani ka la ïoh 8,381 ‘vote’. U kyrtong ka NPP, u Rakesh Sangma u la ïoh 7,628 ‘vote’. Shuh shuh haba phai pat sha ka BJP, ka kyrteng u State Vice-President bad MDC ka Tura, u Bernard N. Marak, ka la paw hakhmat na bynta ka ilekshon shiteng samoi ha Gambegre.
