Shillong, Naitung 21
Ban ai ïa ka jingshakri kaba kham paka bad kaba janai na ka bynta ka Ri bad ka Jaitbynriew, u Bah H.T.Wells Sten uba dei uwei na ki nongthoh kot ka jylla, ha ka 20 tarik u Naitung 2024, u la ïoh ban pyllait paidbah sa ïa kawei pat ka kot kaba la ai kyrteng “KI BYMMAN HA KI JAKA BNENG” ha kaba ïa kane ka kot la pyllait paidbah da u MP ka jylla, u Dr. Ricky AJ Syngkon bad uba la long ruh kum u kongsan ha katei ka jinglang kaba lyngkot ïa kaba la pynlong ha ka hall jong ka KJP Synod Sepngi Hall kaba don ha Mission Compound, Shillong.
Haba ai jingkren ha katei ka jingïalang, na ka liang jong u nongthoh u la ong ba ka jingthoh jong u ïa kane ka kot ka dei hadien ba u la ïohi ïa ki mynsien bymman kiba la ïoh ban rung ha man la ki rympei ïing jong ka Jaitbynriew. Bad kumta ban long ka jingïarap ïa la ka Jaitbynriew ban jop ïa kita ki mynsien bymman, u la thoh ïa kane ka kot.
U la ong ruh ba ka jingthoh jong u ïa kane ka kot ka long ba ka jingshakri kam dei ban long tang ha ki saw kynroh jong ka ïingmane lane tang ïa ki parabangeit hynrei ban pynim ruh ïa kiwei ki mynsiem kiba mad ïa ki jingeh ha ka jingshah teh shah khum ha u mynsien bymman lyngba u soitan wat lada ki long na kano-kano ka kynhun niam ruh.
U la ong ba ka jingthoh jong u ïa katei ka kot kam dei eh ban kamai pisa ne ban pynïaid ïew, hynrei ka long ban ïarap ïa ki briew kiba la jot la rem ha ka jingim jong ki.
“Ngam thoh na ka bynta ka jingpynïaid ïew, lada ka mih tang ka bai shon kata ka lah biang ïa nga bad ka jingmut jong nga ka long ban ïalap lyngba ki kot kiba nga thoh ban pynim ïa kiwei pat ki mynsiem”, la ong u Bah Sten.
Na ka liang u kongsan haba ai jingkren ha katei ka sngi, u Dr. Ricky A J Syngkon, u la ong ba lyngba kane ka kot kan long shisha ka jingkyrkhu ïa kito kiba pule ïa ka namar ba ha kane ka kot, ka don ruh ka jubab ban pyllait na ki jingshah teh shah khum ha ki bor jong u bymman.
U la ong ba kiba pule ïa katei ka kot kin ïohi ïa ka jingshisha jong ka jingim ha kane ka juk bad ha kajuh ka por kaba kham sngewtynnad ka long ba hapdeng kata ka don ka lad bad ka lynti ban lait.
“Kumba ju long ha kine ki sngi bad ki por, ki bun ki jingud bad kiba shu kren tang ka jingbym bit bym biang bad ki jingduna kumta ter-ter hynrei ban ai ïa kata ka jubab ym don, kaba sngewtynnad ka long ba nga ngeit ki ban pule ïa kane ka kot kin ïohi hangne ïa ka jingshisha kaba ngi im ha kum kane ka juk bad ha kajuh ka por pat kaba kham sngewtynnad ka long ba hapdeng kum kata ka don ka lad bad lynti ban lait, kaba kham sngewtynnad ka long ba i pyndonkam beit da ka nongrim ka ktien jong u Blei”, la ong u Dr. Syngkon.
Ha kane ka sngi la wan ban ïadonlang ruh da ki Pastor ka Balang kiba kynthup ïa u Pastor W C. Khongwir kum u Symbud Kongsan ha ryngkat ki bahaïing hasem jong u Bah H.T. Wells Sten bad kiwei-kiwei.
