Tura, Naitung 21
Ka Achik State People’s Front (Williamnagar Regional Unit) ka la thoh sha u SDO ka PWD – Williamnagar ban pynpaw ka jingpyrshah halor ka jingpynkynriah ïa ka surok PMGSY hapdeng ka Rongjeng – Adokgre – Bamil na East Garo Hills (Williamnagar Division) sha South West Khasi Hills (Mawshynrut).
Ha ka jingujor kaba la aiti ha ka Sngi Saitjaiñ, ka seng ka la kam ba kane ka surok ka long ka lynti ba kongsan na bynta ka leit ka wan, kamai-kajih bad ka ïaid ka ïeng ba man ka sngi.
Ki la pynsngew ba ka jingpynkynriah ïa ka surok ym tang ba kan ktah ïa ki kam ki jam, hynrei ïa ka roi ka par hapoh ka thaiñ.
“Ban pynkynriah noh ïa kane ka surok sha kawei pat ka Division kan pynduh noh ïa ka hok jong ka imlang-sahlang jong ngi haba phai sha ki jingdon-jingem bad ka jingshimkhia kaba donkam ban ïaid shakhmat. Ka long kaba donkam ba ka Sorkar kan sngewthuh ïa ki jingdonkam kyrpang kaba shah na bynta ki bor pynïaid ka PWD haba ïadei bad kine ki jingtei,” la pynpaw ka seng.
Na ka liang ka ASPF ka la kyrpad ban pyndam noh ïa katei ka hukum – ban pynkynriah ïa ka surok sha kawei pat ka Division da kaba buh jingmut ïa ka roi ka par bad ka bha ka miat jong ka imlang-sahlang.
