Nongstoiñ, Naitung 21
Ka long kaei-kaei kaba pynkyndit ïa ka HYC Mawthadraishan Circle halor ka jingïoh lad jong u drok ban rung hapoh ka dong bad ka thaiñ Mawthadraishan, Eastern West Khasi Hills District.
U samla Shembor Langrin, President ka HYC Mawthadraishan, u la ong ba ha ka thma pyrshah ïa u drok da ka Seng HYC hapoh ka Jylla, ha ka janmiet jong ka Sngi Saitjaiñ, ka seng hapoh ka jingïalam jong u ryngkat ki dkhot, ki la ïoh ban kurup drok bad thyrnia injek na uwei u samla ka thaiñ Mawthadraishan.
U la ïathuh ruh ba kane ka jingïoh kurup drok ka HYC ka dei ha ryngkat ka jingïatreilang bad ki bahaïing jong utei u samla uba la kyrni ha u drok.
U la ong ruh ba hadien ba ki la ïoh ban kurup ïa u drok, na ka liang ka seng ka la thang ingkhong syndon ïa u drok lem bad ki thyrnia injek.
U samla Shembor u la ong ruh ba ka seng ka la ïoh ban ïasyllok bad ki bahaïing hasem bad ïa utei u samla bad ban ïarap ruh ïa katei ka ïing ka sem ban phah sumar noh ïa utei u samla sha ki ‘Rehab Centre’.
Na ka liang ka HYC Mawthadraishan Circle ka kyrpad ïa ki nongïalam shnong, ki seng trei mon sngewbha, bad khamtam eh ïa ki bor jong ka aiñ ba kim dei ban kheiñ sting hynrei ban peitngor hapoh ka thaiñ Mawthadraishan bad ka Eastern West Khasi Hills hi baroh kawei khnang ba u drok un ym ïoh ban rung hapoh ka thaiñ.
