Shillong, Naitung 21
Ka Rotary Orchard ha ryngkat ka jingïasnohkti lang bad ka Khasi Hills Autonomous District Council (KHADC), ka Meghalaya Farmers (Empowerment) Commission, ka Rotary Club of Shillong, ka District Horticulture Office bad ka Kur Kharbuli, ha ka 19 tarik u Naitung 2024 ka la ïoh ban thung haduh 500 tylli ki tynrai dieng sohphoh Khasi ha Aïom Ksiar kaba don ha Sohryngkham.
Ha kane ka sngi, la wan ban don ryngkat lang da u CEM ka KHADC, u Bah Pynïaid Sing Syiem, u Manas Chaudhury uba dei u Myntri barim ka sorkar jylla, ka Kong A. R Suting, MAS, District Horticulture Officer, East Khasi Hills ha ryngkat kiwei-kiwei pat ki nongïalam ka Rotary Club of Shillong, ki khynnah skul, ki nongïalam shnong bad ki ‘riew paidbah.
Na ka liang u CEM u la ong ba ka Sohryngkham ka long ka shnong kaba paka tam ban thung ïa ki jingthung kiba bun jait. Lyngba kane ka jingthung ïa kine ki tynrai dieng sohphoh Khasi, ka long ka jingsdang bad nangne shakhmat yn sa thung ruh sha kiwei pat ki jaka lyngba ka jingïatreilang bad kiwei pat ki kynhun.
“Nga ngeit skhem ba kane ka jingsdang jong ngi ban thung ïa kine ki 500 tylli ki tynrai dieng sohphoh Khasi kan dei kum ka jingsdang bad kam pat dei ka jingkut hynrei nangne shakhmat ngin sa ïaid sa sha kiwei-kiwei ki jaka”, la ong u Bah Pynïaid. U Bah Pynïaid u la ong ruh da kaba thung dieng ha ka jaka ka bym don dieng bad kaba syllen ki khlaw lehse kan ïarap ïa ngi ym tang ba ngin ïoh ïa ka jingmyntoi na ka jingïoh ban die ïa ki soh hynrei kan ai ruh ka jingmyntoi ïa ngi ba ngin ïoh ïa ka lyer kaba khuid ba suba ba ngin lah ban ring mynsiem.
Ha kajuh ka por, u CEM u la ai jingmut ïa ka Rotary ba ka dei ruh ban leh eiei ban tehlakam ïa ki jingjaboh jong ki tyllong um, ki wah khamtam ïa ka wah Umngot bad ka Wah Umkhen kiba dei ki wah kiba don hapoh kane ka shnong bad kiba ai jingmyntoi shikatdei eh ïa ki nongshong shnong katei ka thaiñ.
