Shillong, Naitung 22
U President ka Voice of the People Party (VPP), Bah Ardent M. Basaïawmoit ha ka Lah Sngi U Blei u la kyrpad ïa ka Deputy Commissioner ka East Khasi Hills, Kong R. M. Kurbah ban tuklar lem halor ka projek surok Shillong-Dawki da kaba phah sangeh mardor ïa ka National Highways & Infrastructure Develop-ment Corporation Ltd (NHIDCL) ïa ki kam tih kiba ka la sdang mynta ha ka shnong Mawshun.
Haba pynsngew halor kaei kaba la jia ha ka shnong Mawshun katkum ka jinglap ki nongïalam ka seng bad ki lad pathai khubor ha ka 17 tarik Naitung, 2024, u Bah Basaïawmoit u la ïathuh ba ka seng hadien ka jingkyrpad ki bor pynïaid ka shnong Mawshun, ka la leit jngoh ïa ka shnong ban ïoh ïa ka jingtip kaba tikna halor ka jinglong-jingman ba ïadei bad ka jingshim jaka na bynta ban pynbha ïa ka surok Shillong-Dawki jong ka NH-40.
“La lap ba ka NHIDCL ka la ïaid shakhmat bad ki kam tih jong ka ha ka jaka ka bym pat shym la aiti da ki trai jaka – kaba long pyrshah ruh ïa ka rai jong ka Dorbar Shnong. Ha kajuh ka por, ka NHIDCL ka la pynjulor ïa katto-katne ki jaka jong ki nongshong shnong ki bym pat ai jingbit na bynta ban shna ïa katei ka surok. Ki trai jaka ki la dep ujor ejahar pyrshah ïa ka kompeni halor ka jingpynjulor ïa ka jaka, ki dieng, ki jingthung-jingtep bad ki mar-rep,” la ong u President ka VPP ha ka shithi ba la phah sha ka DC.
U la ong ruh ba ka paw shai ba kiba bun tylli ki tyllong um ha ki sawdong-sawkun jong ka thaiñ kin sa shah ktah lada ïaid shakhmat bad katei ka kam nalor ka jingjulor jong ki jingthung ba don jingim bad ki mrad ki mreng.
Haba kdew ba kane kan pynsyllen ruh ïa ki khlaw ki btap bad ktah ïa ka basa-jingim hapoh ka thaiñ, u Bah Basaïawmoit u la ong ba la pynsngewthuh ruh sha ki nongïalam ka seng ba ka Dorbar Shnong kam pyrshah ïa katei ka projek surok, hynrei ka kwah ba kane ka surok kan ïaid lyngba na ka surok kaba la don lypa.
“Kumta, katkum kitei ki jinglap bad jingkyrpad na ki bor shnong, nga kwah ban kyrpad ïa phi ba phin tuklar lem halor kane bad ban pynsangeh mardor ïa ki kam tih khyndew da katei ka kompeni ban khang ïa kino-kino ki jingjia kiba lah ban mih,” la ong utei u nongïalam.
Shuh shuh u la bynrap, “Lah ban sngewthuh ruh ba ka jingeh ka kham khraw ban ïa kaei kaba ïohi, kumta kan long kaba biang eh na bynta ka bha ka miat jong kito kiba don ka jingsngewkhia bad dei ban kynthup lang ïa baroh khamtam ka Dorbar Shnong bad ki bor pynïaid ban pynbeit noh shi syndon ïa kane ka kam.”
