Nongpoh, Naitung 22
Ki heh ophisar jong ka tnat Labour, ka tnat Infiltration ka Ri Bhoi District bad ki pulit ka thanat Umïam ha ka Lah Sngi U Blei ki la pynlong ïa ka jingkhynra ïa ki kot ki sla jong ki nongtrei bar jylla ha Umïam Industrial Area ha ryngkat ka jingsynran lang jong ki nongïalam ka shnong Umïam.
Haba kren sha ki lad pathai khubor hadien katei ka jingleit khynra, u Rangbah Shnong ka Umïam, u Bah Stevenson Kharkrang u la pyntip ba na ka liang jong ka shnong hadien ka jingïoh ïa ka shithi na ka tnat Labour, ki la leit ban synran lang namar kum ki nongïalam shnong ki dei ma ki kiba tip khambha ïa ka jinglong jingman hapoh ka shnong ka thaw.
Utei u nongïalam shnong u la ong ruh ba ki nongtrei bar jylla ha katei ka shnong ki la ïoh rung laitlan shaba palat ha kaba u la kynnoh ruh ba katei ka jaka, ka la kylla long pynban kum ka ktem jaka rieh jong ki nongleh kam bymman.
U la ïathuh ruh dang ha kine ki khyndiat bnai, uwei na ki nongïalam shnong u la shah ktah kti ha uwei u nongtrei bar jylla ha katei ka jaka. Haba ki bor shnong ki leit ban wad ïa uta u nongtrei bar jylla, u trai jong kawei na ki karkhana u la ïathuh ba uta u nongtrei bar jylla u la dep ban phet krad ïalade bad pyntip ruh ba um don satia wat tang kawei ruh ka kot ka sla ban pynshisha u dei naei bad ong ruh ba kane ka buh jingma shikatdei ïa ka shnong ka thaw.
U Bah Stevenson u la ïathuh ruh ba na ka liang jong ki bor shnong na ka por sha ka por ki ju khot jingïalang ïa ki trai jong ki karkhana bapher bapher kiba don hapoh ka Umïam Industrial Area ba ki dei ban pyntip sha ki bor jong ka shnong bad ruh ban pynbiang ïa ki kot ki sla jong ki nongtrei jong ki kaba kynthup ruh ïa ka ‘police verification’ na ka jaka kaba ki wan, naba khlem ki kot ki sla kiba biang, ym lah ban tip uno uba bha bad uno uba sniew.
Utei u nongïalam shnong, u la kynnoh ruh ba ki trai jong ki karkhana bapher bapher kiba don ha katei ka jaka, ki dei kiba don tang ïa ka jingthmu ban kamai pisa bad kim don satia ïa ka jingïatreilang bad ki bor shnong da kaba ïaid lait ïa ki kyndon kiba kum ka shnong ka ju ai sha ki ha ka por ba ki wan ban pynthymmai ïa ka No Objection Certificate.
Halor kane ka jingkhynra kaba la pynlong ha kane ka sngi, utei u nongïalam u la ong ba bun hi na ki nongtrei bar jylla ha kane ka jaka kim don satia ïa ki kot ki sla kiba biang bad buh ruh ka jingkyntu sha ka tnat Labour bad KHADC ba ki dei ban pynkhlaiñ shuh shuh ïa ka jingtreikam jong ki aiñ kiba la don lypa, ym ban shu khynra pyndep rukom.
U Bah Stevenson Kharkrang u la pyntip ruh ba kito ki nongtrei bar jylla ki bym don ïa ki kot ki sla kiba biang, ki dei ban mih noh na katei ka jaka bad bynrap ruh kum ka shnong kan nym shongthait hynrei kan dang ïai buddien ban khynra ïa ki nongtrei bylla, bad lada ki dang don kiba ïaleh pyrshah ka shnong kan hap ban shim ïa ki sienjam kiba tyngeh nangne shakhmat.
Utei u nongïalam shnong u la ong ruh ba ka jingshim jong ka shnong ïa kine ki sienjam ka long kum shi bynta ban wanrah ïa ka shongsuk shongsaiñ hapoh ka shnong ka thaw bad ki bar jylla kiba wan trei hapoh ka shnong ruh ki dei ban wan ha ka lynti kaba dei ym kum u nongtuh ban shu wan shiteng miet da ki lynti ki bym dei.
