Shillong, Naitung 22 (UNI)
Namar ka jinglong-jingman na ka jingïakynad ha Bangladesh, ka tnad shipai Border Security Force (BSF), Meghalaya Frontier kaba peitngor ïa ka khappud India-Bangladesh kaba don 444 km ka la nang pynkhlaiñ shuh-shuh ïa ki bor pahara ha shi lynter khappud da kaba pynlong ruh ïa ka ‘Operation Alert’ ban pyntikna ïa ka jingskhem ha ka jingshakri bad ka rukom pynïaid, la ong ka BSF ha ka Lah Sngi U Blei.
U Inspector General (IG) ka BSF-Meghalaya Frontier, u Harbax Singh Dhillon u la pynpaw ba kawei na ki jingsngewkhia ha kane ka por ka dei ka jingwan phai suk jong ki samla pule ka India kiba pule ha Bangladesh.
“Naduh ka 18 Naitung, 2024, ka BSF-Meghalaya ka la ïarap haba ïadei bad ka jingwan rung jong 574 ngut ki samla pule ka India, kumba 435 ngut ki samla pule na Nepal bad 8 ngut ki samla pule na Bhutan lyngba ka Dawki Integrated Check Post (ICP) ha East Khasi Hills, Meghalaya,” la ong u IG.
“Nalor kine, sa 18 ngut ki samla pule ki la wan rung mynta ka sngi lyngba ka ICP-Kilapara ha West Garo Hills, Meghalaya,” u la ong.
Na ka liang utei u khlieh ka BSF-Meghalaya Frontier u la bthah ïa ki ophisar ka tnad ban ïarap lem ïa ki nongshong shnong ka India, khamtam ki samla pule kiba wan rung na ICP-Dawki bad ICP-Kilapara da kaba kner ïa ka jingkyrshan bad jingïarap kum ha ka liang ka umbam-umdih, song jingbam, bad ki dawai-dashin nalor ka leit ka wan jong ki sha ki jaka ba ki thmu, la ong u ophisar ka tnad BSF.
Ka BSF ka la ïathuh ruh ba ka tnad ka dang khmih lynti shuh ïa ki samla pule ki ban wanphai katba ka jinglong-jingman ha Bangladesh kam pat jai-jai.
Haba pyntika ïa baroh ki lad jingïarap bad jingkyrshan na ka liang ka BSF sha baroh ki nongshong shnong na ki ri bapher-bapher khamtam ki nong India kiba wan rung sha India lyngba ki lynti kiba biang, ka BSF ka la ban biang ba ki bor pahara ha ki khappud India-Bangladesh la nang pynkhlaiñ shuh-shuh ban pyntikna ba kan ym don kano-kano ka jingrung tuh jong kiba nabar.
