![Da ka jingïalang wanrah ki bor sorkar ban weng ïa ki jingeh ba mih na u pud u sam iakajia-border](https://unongsainhima.com/wp-content/uploads/2024/07/iakajia-border-720x408.jpg)
Itanagar, Naitung:
Ki dkhot ba dang shu shah pynrung thymmai ha ka Regional Border Dispute Committee na ka bynta ka Papum Pare distrik ha Arunachal Pradesh ki la ïa kynduh ha ki khyndiat sngi ba la leit ban bishar bniah halor ki kam ba la leh da ka Committee ba hashuwa bad ban bishar bniah halor ki jinglong jingman kiba don mynta bad ban thaw ïa ki lad ki lynti ban lah ban weng ïa ki jingeh kiba mih halor ki mat ba ïadei bad ki bynta khappud bad ka jylla ba marjan ka Assam.
Ha kane ka Committee ba la thaw thymmai ka kynthup ïa u Myntri ba dei khmih ïa ka Land Management u Balo Raja kum u Chairman bad u MLA ka Doimukh u Nabam Vivek, u MP ka Rajya Sabha u Nabam Rebia, u Deputy Commissioner ka Papum Pare bad u SP kum ki dkhot jong ka.
Da kaba bishar bniah ïa ki jingshisha baroh, ngi lah ban thaw ïa ki lad ki lynti kiba don jingmut, kiba buh ryntih ïa ki daw bakyrpang jong ka thaiñ kiba long ki daw halor ki mat ba ïadei bad ki bynta khappud, la ong u Vivek.
U Vivek u la bthah ïa ki ophisar ba dei khmih ba kin pyndep ïa ka jingbishar bniah ïa ki jaka khappud ha u bnai Nailar, bad u la tyrwa ruh ban ïakynduh bad ka jylla Assam ha u bnai Nailur mynta u snem.
U dkhot jong ka Rajya Sabha u Nabam Rebia haba pynshai halor ka MoU ba la soi da ki Myntri Rangbah ka Assam bad Arunachal Pradesh ha ka por ba pynbna ïa ka Namsai Declaration, u la khot ban don shwa ka jingïakren bad ki bor synshar shnong, ki nongïalam shnong bad ki briew ba shah ktah hashwa ban shim ïa kano kano ka rai ha kaba ïadei bad ka mat halor u pud u sam bad ban ïatreilang na ka bynta ban weng ïa baroh ki jingeh.
U Deputy Commissioner jong ka Papum Pare u Jiken Bomjen u la khot bad ai jingmut na ka bynta ban pynïaid ryntih ïa ka jinglong jingman ha ki thaiñ khappud bad ban kiar katba lah ban wanrah ïa ki jingïapher jingmut la ka long ha kano kano ka rukom.
U la batai shai shaphang ki jinglong jingman jong ki mat ba ïadei bad ki bynta khappud bad ka Lakhimpur bad Sonitpur distrik jong ka Assam ryngkat bad ka Papum Pare bad u la ïathuh shai ruh halor ki jingpyntreikam ba ïadei bad u pud u sam.
U President jong ka Border People’s Forum u Nabam Akin Hina u la ai jingmut ban pynlong ïa ki jingïalang ha ki shnong katkum ki kyrdan bad ban pynlong da ka jingpahara ha ki thaiñ ba don ha ki bynta khappud khnang ban khmih bniah ïohba don ki kam beaiñ.
U la kdew shai ruh ha kaba ïadei bad ka jingduna jong ki pulit ha ka jaka treikam ki pulit ha Kimin.
U Deputy Director jong ka Inter-State Border Affairs u Rome Mele u la pyni ïa ka PowerPoint ha kaba ïadei bad ka jingïeng jong ki shnong khappud jong ka Papum Pare bad ki jingdawa jong ki paidbah ba shah ktah jong ka Assam bad Arunachal.