Shillong, Naitung 23
Ka khubor na ka tnat pulit ba la ïohlum lyngba ka ‘website’ ha ka Sngi Ba-Ar ka ïathuh ba kawei ka nongshong shnong ka la ujor ba hapdeng ka 16 bad 17 tarik Naitung, ka la bei tyngka kaba la kot sha ka T. 90,000 ha kawei ka sla ba mih ha Facebook ïa kaba la tip kum ka ‘Money Income’. Hynrei kane ka nongshong shnong kaba shong ba sah ha Shillong ka la sngewthuh hadien ba ka la shah shukor.
Ha kawei pat ka jingjia, u Banmaitphang Ïawim u la ujor ba ha ka miet jong ka 19 tarik Naitung, ki runar ki la tuh ïa ka thuk-thuk jong u (ML-05AC-4964) na ka ïing sah jong u kaba don ha Lumsohphoh, Laitumkhrah, Shillong.
Nalorkata, ki pulit ki la pyntip ba ha ka step jong ka 21 tarik Naitung, ki runar ki la tuh ïa ka thuk-thuk (ML-05AC-6099) kaba dei jong u Joshua Dohling najan Shillong College, Shillong.
Shuh shuh ki pulit ki la ong ba u Sayan Reang u la ujor ba ha ka miet jong ka 19 tarik Naitung, ki runar ki la tuh ïa ka thuk-thuk (TR-01AT-8372) na ka ïing sah jong u kaba don ha Nongrah, Shillong.
Sa ha kawei pat ka jingjia, u Steve Steward Syiemlieh u la ujor ba ha ka 19 tarik Naitung ha ka por kumba 7:30 janmiet, ki runar ki la tuh ïa ka thuk-thuk jong u (ML-05Y-3484) na Lumshatsngi, Shillong.
Nalorkata, ki pulit ki la ong ba ka Kong Iolinda Kharsati ka la ujor ba ha ka 19 tarik Naitung, ki runar ki la tuh ïa kawei ka Pump um bad ki mar ki mata shna ïing na ka ïing kaba dang shna kaba don ha Madanrting Block-D, Shillong.
Ha kawei ka jingujor ba la ai sha ki pulit, la ong ba ha ka 20 tarik Naitung ha ka por kumba 1:10 mynstep, ki runar kiba la shong ha kawei ka kali Alto ki la kawang maw ïa kawei ka dukan (M/s Hardware Shop) ha Mihmyntdu, West Jaiñtia Hills. Namarkata, ka jingjulor na kane ka jingshah kawang maw ka la kot sha kumba T. 1.10 lak. Ïa kane ka jingjia baroh la ïoh ban ring dur lyngba ki kor CCTV.
Shuh shuh ki pulit ki la ong ba u Arun Pratab Mishra u la ujor ba ha ka 20 tarik Naitung ha ka por kumba 7 baje mynstep, ki runar bym lah ban ithuh ki la tuh ïa ka pla jong u kaba don phra tylli ki Mobile Phone ba shongdor T. 1.12 lak na ka jaka pynïeng kali kamai (Taxi Stand) ha Laitumkhrah, Shillong.
