Shillong, Naitung 23
Hadien 73 tylli ki snem naduh ba la thaw ïa ka, ka Khasi Hills Autonomous District Council (KHADC) ha ka Sngi Ba-ar ka la ïoh ïa la ka jong ka Library ne ka jaka buh kot ka ban lap ruh ïa ki jingthoh naduh ki snem 1952.
Kane ka sngi kan dei ruh ka sngi sah kynmaw bad ka burom na ka bynta ka KHADC namar hadien 73 snem naduh ba plie ïa ka ha u snem 1952 ha kato ka por ba la tip kum ka United Khasi and Jaiñtia Hills Autonomous District Council, ba u Lat ka jylla un leit ïuh kjat ha ka sien kaba nyngkong eh.
Ha kane ka sngi, u Lat ha shwa ban plie ïa ka library, bad hadien ba la dep ban pdiang burom ïa u, u Lat u la leit ban pyndon burom ïa u Kpa jong ka Khyrnit Bahynriew, da kaba buh syntiew hakhmat u dur mot jong u Rev. JJM Nichols Roy uba don ha phyllaw jong ka KHADC. Haba kren sha ki lad pathai khubor hadien ba la dep ban plie ïa ka library da u Lat, u CEM jong ka KHADC u la ong ba ka jingthmu jong ka KHADC ban buh ïa ka Library ka long ba kin buh ïa ki kot kiba ïadei bad ka riti dustur jong ka jaidbynriew bad ong ruh ba kan long kaei-kaei ka ban sah jingkynmaw ba ka council ka la ïoh ïa la ka jong ka library.
