Shillong, Naitung 23
Ka kynhun jong ki seng bapher bapher na rilum Garo ha ka Sngi Ba-ar ki la dawa ba dei ban thung da ka ‘Magisterial Enquiry’ halor ka jingkhlad noh jong kawei ka samla ha Girls Hostel jong ka Shillong Polytechnic hadien ka jingbym hun jong ki bahaïing ïa ka kaiphod jong ka ‘post mortem’.
Lah ban pynkynmaw ba ha ka step jong ka 6 tarik Jymmang 2024, la lap ïa ka met jong ka samla kaba la tip kyrteng kum ka Diana Ch Marak ha u tyllai phasi, bad la suba ba katei ka samla ka la shim hi ïa la ka jingim da kaba sdien phasi ïalade.
Kitei ki seng na rilum Garo kiba la buh ka jingdawa ban thung da ka ‘magisterial enquiry’ hakhmat ka Deputy Commissioner jong ka East Khasi Hills ki kynthup ïa ka FKJGP, GSU, ADE, AYWO bad ka FAF.
Ka Diana Ch Marak, 24 snem ka rta, na Babupara, Tura West Garo Hills District ka pule ha Shillong Polytechnic, Mawlai ha ka kyrdan 4 semister jong ka Civil Engineering.
Ki nongïalam jong kitei ki seng ha ka Sngi Ba-ar ki la leit ban ïakynduh ïa ka DC ka Kong RM Kurbah, ha kaba la aiti ruh ïa ka dorkhas bad ban kyrpad ba kan tuklar lem halor ka jingbym sngewhun da ki bahaïing ïa ka rukom tohkit halor ka jingkhlad jong katei ka samla.
Haba kren sha ki lad pathai khubor hadien ba la dep ïakynduh ïa ka DC, u President ka FKJGP Garo Hills Zone, u Pritam Arengh u la ong ba ka jingdawa ban tohkit da ka ‘magisterial enquiry’ ka dei hadien ba ki bahaïing kim hun ïa ka kaiphod jong ka ‘post mortem’, khamtam lada ïap mynsaw ka kynthei briew donkam ban leh ïa ka Histopathology, hynrei ki doktor kiba leh ïa ka ‘post mortem’ kim shym la leh satia ïa kata, kaba la pynartatien ïa katei ka kaiphod.
U la ong ba hadien ba la ïoh ïa ka jingujor na ki bahaïing bad hadien ba la ïohi ïa ki dur, ka la pynartatien ïa katei ka jingïap, namar ki don ki dak mynsaw ruh ha ka met wat la ka kaiphod ‘post mortem’ ka pynpaw ba ka jingïap ka dei na ka jingsdien phasi.
Katkum ka dorkhas, la ong ba ki bahaïing jong katei ka samla kaba la khlad noh, ki la pynsngew ïa shibun kiei-kiei sha ki nongïalam jong kitei ki seng, kaba khlem ïahap bad ka khana bad ka jinglong-jingman ka rukom ïap jong ka samla Diana.
Shuh shuh ha ka dorkhas kitei ki seng ki la ong, “Ngi ki seng na rilum Garo, ngi kyrpad ïa phi ba phin shimkhia ïa kane ka kam, namar kum kine ki jingjia la ju ïohsngew mynshwa ha kajuh ka jaka pule bad kum kine ki jingjia ba sngewsih ym dei ban shim sting namar ka lah ban wanrah ïa ka jingduh mynsiem kaba kham bun. Ka jingwan shakhmat ka long beit halor ka nongrim ba dei ban ai ïa ka hok sha katei samla kaba la khlad bad sha ki bahaïing jong ka bad ka rukom treikam ka dei ban ïaid ha kata ka rukom ba ka jingtohkit kam dei ban don kano-kano ka jingleh klet ne noh shilliang.”
Shuh shuh ki nongïalam seng ki la pynpaw ruh ba ka Shillong Polytechnic ka dei ban pyndonkam ïa ki kor CCTV ban ïarap ïa ki samla pule ba kin lait na kino-kino ki jingma ïa ka met bad ïa ka jingim ka jong ki.
