Shillong, Naitung 23
Ka Khelo India kaba dei ka projek ba kongsan tam ban kyntiew ïa ki kam ïalehkai naduh tynrai, ka la long sa shisien ka nongïoh jingmyntoi kaba heh tam ha ka mang tyngka jong ka Sorkar Pdeng na ka bynta ka tnat ïalehkai namar la mang T.900 klur na baroh ki jingai kiba la kot sha ka T. 3,442.32 klur ha ka Sngi Ba-ar.
Ïa kane ka bhah jong ka Kehlo India, la pynbna ha ka mang tyngka ba la wanrah da ka Myntri ka tnat pla tyngka ka Nirmala Sitharaman hangne, ka long T.20 klur tam na ka mang tyngka ba la pynkylla kaba T.880 klur ha u snem ba la dep.
Da ka jingïalehkai Olympic ka ban kut ha u Paris ha u Nailar mynta u snem, bad ka Commonwealth Games bad ka Asian Games ka dang sah sa ar snem, ka mang tyngka na ka bynta ka tnad ïalehkai yn ïohi ïa ka jingkiew khyndiat kaba T.45.36 klur na u snem ba la lah.
Ka mang tyngka na ka bynta u snem ba la lah ka long T.3,396.96 klur. Ka sorkar ka la bei tyngka shibun ha ka Khelo India ha kine ki snem ba la lah katba kane ka prokram ka dang bteng ban sei ïa ki sap na kylleng ki bynta jong ka ri.
Katba ka mang tyngka ba shisha jong ka Khelo India ha u snem 2022-23 ka kot sha ka T. 596.39 klur, la pynkiew da palat T. 400 klur, sha ka T. 1,000 klur, ha ka mang tyngka jong u snem 2023-24, shwa ban pynkylla sha ka T. 880 klur.
Ka sorkar ka la bteng ban pyndap ïa ki prokram naduh ba la pynlong nyngkong ïa ka Khelo India Youth Games (KIYG) ha u snem 2018.
Ka tnat ka la pynrung ïa ka Khelo India University Games ha u snem 2020, shwa ban sdang ruh ïa ka Khelo India Winter Games ha ujuh u snem bad ïa ka Khelo India Para Games ha u snem 2023.
Kumba ka long mynta da ki spah tylli ki Khelo India State Centres of Excellence (KISCE) la thaw ha kylleng ka ri, kiba thmu ban pynbiang ïa ki lad ki lynti na ka bynta ki nongïalehkai kiba don sap. Katto katne ngut ki nongïalehkai Khelo India ki don mynta ha ka kynhun ïalehkai jong ka India kaba la leit sha ka Olympic.
Ka jingïarap jong ka sorkar sha ki National Sports Federations (NSF) ka la kiew ruh da 15 klur tyngka na ka 325 klur tyngka ha u snem 2023-24 sha ka 340 klur tyngka ha ka mang tyngka ba khatduh.
Ka mang tyngka na ka bynta ka Sports Authority of India, kaba nalor ba ka sumar ïa ki jaka ïalehkai ha kylleng ka ri, hynrei ka pynïaid ruh ïa ka Target Olympic Podium Scheme (TOPS) ban pynkhreh ïa ki nongïalehkai na ka bynta ki jingïalehkai ba pawnam ha ka pyrthei, la pynkiew na ka T. 795.77 klur sha ka T. 822.60 klur, kaba ka long ka jingkiew kaba T.26.83 klur.
Na ka liang ka NADA bad ka National Dope Testing Laboratory (NDTL), kaba leh ïa baroh ki test, ki la ïoh ïa ka jingpynkiew kaba rit ha ka mang tyngka jong ki.
Kane ka mang tyngka jong ka NADA ka la kiew na ka T.21.73 klur ha u snem ba la lah sha ka T.22.30 klur, ka NDTL ka la ïoh T.22 klur, kaba kiew na ka T.19.50 ha u snem ba la lah.
