Khliehriat, Naitung 23
Ka shlem treikam jong ka District Medical & Health Officer (DMHO), East Jaiñtia Hills District ha ka 23 tarik Naitung ka la rakhe ïa ka World Hepatitis Week 2024 ha Opioid Substitution Therapy (OST) Centre, East Jaiñtia Hills District, Khliehriat halor ka phang “It’s time for Action”.
Ha kane ka sngi la donlang u District Medical & Health Officer, East Jaiñtia Hills District Dr. D Shylla, u Nodal Officer Treatment Centre, National Viral Hepatitis Control Program (NVCH), Khliehriat Dr. D Nongpluh, u Medical Officer ba peit ïa ka Opioid Substitution Therapy (OST) Centre Khliehriat u Dr. J Nongtdu, ki nongpang Hepatitis bad kiwei kiwei.
Haba kren ha ka jingïalang, u DMHO East Jaiñtia Hills Dr. D Shylla u la ong ka jingpang Hepatitis ka dei ka jingat dohnud ne Liver bad ka dei ka jingpang kaba ma bha.
U la ong ruh ba ïa ka World Hepatitis Week la rakhe ha kylleng ka pyrthei ban pynsngewthuh sha ki paidbah halor ki lad jingïada kiba ki paidbah ki lah ban shim khnang ban ïarap bad ïada na ka jingpang Hepatitis.
Ha kaba ïadei bad ka phang “It’s time for Action”, u Dr. Shylla u la kyntu ïa ki nongwan ïashim bynta ba kin tip ïa ka jinglong jingman ka jong ki ha kaba ïadei bad kane ka jingpang bad kin phah peit bniah khnang ban lah ïada ïalade na kane ka jingpang.
U la kren ruh halor ka jingdon jong ki dawai ba la ai da ka sorkar sha ki briew kiba ïoh ïa kane ka jingpang Hepatitis.
U Nodal Officer, Treatment Centre, National Viral Hepatitis Control Program (NVCH), Khliehriat Dr. D Nongpluh u la kren ruh halor kumno ka jingpang Hepatitis ka rung ha ka met u briew, ka jingktah, ki jait jingpang Hepatitis bapher bapher, ki dak ki shin bad kumjuh ruh ki kyrdan bapher bapher jong kane ka jingpang.
